Interesi i të rinjve për programin “Garancia Rinore” ka ardhur në rritje gjatë vitit 2025. Vetëm gjatë vitit të kaluar, pranë Zyrës së Punës në Shkodër janë regjistruar 429 aplikime. Drejtoresha Rozafa Zmijani bën me dije se mbi 300 të rinj janë kontaktuar brenda afatit 4-mujor, duke marrë një ofertë konkrete punësimi ose mundësi për trajnim profesional falas.

“Kemi pasur një numër shumë të lart aplikimesh rreth 429 të reja për vitin e kaluar nga të cilët 311 persona i kemi zgjidhur brenda 4 muajve”, u shpreh Rozafa Zmijani, Drejtore, Zyra e Punës Shkodër.

Pavarësisht interesit të lartë, përputhja mes kërkesave të tregut, pritshmërive për pagën dhe preferencave të të rinjve mbetet një sfidë. Megjithatë, sipas Zmijanit, situata ka ndryshuar ndjeshëm, veçanërisht në sektorin e turizmit.

“Ndryshon në sektorin e turizmit kur pagat janë më të larta”, tha ajo.

Programi “Garancia Rinore” konsiderohet një nga instrumentet më të rëndësishme për të nxitur punësimin e të rinjve dhe për të frenuar emigracionin, duke ofruar alternativa konkrete zhvillimi profesional në nivel lokal.

Gazetare: M. Gjoni  

/rtsh.al/