Më shumë vëmendje dhe përkujdesje ndaj kafshëve të braktisura,  ky ishte mesazhi që u përcoll në Ditën Botërore të Kafshëve Endacake, gjatë një aktiviteti sensibilizues të organizuar në qendër të qytetit të Shkodrës.

Drejtues dhe punonjës të shërbimit veterinar pranë Bashkisë, dhe vullnetarë të organizatës “Animals Need Me”, theksuan se ndërgjegjësimi qytetar është në rritje.

Sipas tyre, vitet e fundit është vënë re një ulje graduale e numrit të qenve endacakë në rrugët e qytetit, si rezultat i ndërhyrjeve për sterilizim, vaksinim dhe identifikim.

“Kanë filluar më shumë të adoptojnë, të përkujdesen por kemi ende shumë punë për të bërë”, u shpreh Elda Ahmetaj, Aktiviste në shoqatën “Animals Need Me”.

Paralelisht me këtë tendencë në rritje të kujdesit, është shtuar numri i kafshëve të strehuara në qendrat e grumbullimit të Bashkisë dhe në strehat e administruara nga organizatat vullnetare. Kjo situatë kërkon më shumë mbështetje nga komuniteti, si në drejtim të adoptimit, ashtu edhe në përkujdesjen e përditshme.

“Numri i qenve në strehën e bashkisë ka arritur 230, trajtimet janë në mënyrën më specifike, ushqimi nuk mungon, sterilizimet janë falas”, tha Albana Bilali, Vullnetare, Bashkia Shkodër.

Apeli në këtë ditë të veçantë ishte i qartë: më shumë adoptime, më shumë ndjeshmëri dhe më shumë përgjegjësi ndaj kafshëve të braktisura, të cilat kanë nevojë për mbrojtje dhe dashuri

Gazetar: A. Hoti 

/rtsh.al/