Katër persona kanë humbur jetën në brigjet e veriut të Francës pasi tentuan të kalonin Kanali Anglez, kanë bërë të ditur autoritetet lokale.

“Një varkë ‘taksi’ u mbyt sot. Situata është ende duke u vlerësuar dhe mund të ndryshojë”, thanë autoritetet lokale në Calais në një deklaratë për shtyp të cituar nga Reuters.

Mediat franceze raportojnë se operacionet e shpëtimit janë duke vazhduar të enjten në mëngjes pas incidentit në brigjet pranë Boulogne-sur-Mer, midis plazheve të Équihen-Plage dhe Écault, në jug të Calais.

Rreth 30 persona po marrin ndihmë nga shërbimet e emergjencës, sipas mediave lokale. Zjarrfikësit dhe njësitë e kujdesit intensiv mbërritën në vendngjarje rreth orës 07:30 me orën lokale.

Pas javësh me kushte të vështira, moti në Kanal ka qenë i qetë ditët e fundit. Kalimet zakonisht shtohen gjatë muajve të verës.

Gjatë tre viteve të fundit, kalimet në Kanal janë rritur ndjeshëm, me 41,472 persona që mbërritën në Mbretërinë e Bashkuar me varka të vogla në vitin 2025.

Nga 1 janari deri më 26 mars 2026, gjithsej 4,441 persona kanë kaluar Kanalin Anglez me varka të vogla nga Franca.

Ky numër është 33% më i ulët krahasuar me të njëjtën periudhë në vitin 2025 (6,642 persona), megjithëse kushtet e motit mund të kenë ndikuar, pasi kanë qenë më të ashpra krahasuar me të njëjtën periudhë të vitit të kaluar.