Shoqata Kombëtare e Transportit Qytetas dhe Shoqata e Transportit Urban dhe Interurban njoftojnë se sektori i transportit publik po përballet me vështirësi të mëdha financiare për shkak të mungesës së masave mbështetëse nga institucionet.

Sipas tyre, edhe pse çështja është ngritur prej javësh dhe është zhvilluar një takim me institucionet më 1 prill, deri tani nuk është miratuar asnjë skemë kompensimi për rritjen e çmimit të karburantit dhe nuk ka një plan konkret për lehtësimin e barrës financiare të operatorëve.

Gjithashtu nuk ka afate për ndërhyrje dhe as nisma për rishikimin e elementeve fiskale që ndikojnë në kostot operative, si akciza, taksa e qarkullimit dhe TVSH.

Për shkak të kësaj situate, operatorët paralajmërojnë se duke nisur nga dita e nesërme do të reduktojnë me 40% flotën e mjeteve në qarkullim, duke kërkuar mirëkuptimin e qytetarëve dhe ndërhyrje të menjëhershme nga institucionet.

/rtsh.al/