Rritja e temperaturave dhe prania e lartë e polenit në ajër kanë sjellë shtim të rasteve me alergji stinore në Qendrën Shëndetësore të Këlcyrës. Mjekja Entela Ibrahimi bën të ditur se çdo ditë paraqiten mesatarisht tre raste të reja, kryesisht me simptoma tipike alergjike.

“Rastet me alergji stinore shtohen pasi kemi shumë pelenë. Më shumë janë moshat e mitura. Gjatë kësaj periudhe ka 2 deri në 3 raste në ditë”, u shpreh mjekja Entela Ibrahimi.

Alergjitë stinore shfaqen me teshtima të shpeshta, kruarje të syve dhe vështirësi në frymëmarrje. Sipas mjekes, pacientët duhet të tregojnë kujdes dhe të mos i neglizhojnë këto simptoma, pasi mund të përkeqësohen.

“I bëjmë thirrje prindërve që të kenë kujdes dhe të paraqiten në qendrat shëndetësore edhe në rastet më të lehta që të mos kemi probleme të tjera më të mëdha”, tha mjekja.

Mjekët theksojnë se ndërhyrja në kohë dhe trajtimi i duhur janë të domosdoshëm për të shmangur komplikimet dhe pasojat afatgjata.

Gazetare: Leonida Koçiu

/rtsh.al/