“Mundësia për të jetuar këtu dhe për të luajtur për Lazion ka qenë e mrekullueshme, do të jetë gjithmonë në zemrën time. Është për të ardhur keq që nuk pata mundësinë të bëj më shumë, por po largohem i lumtur sepse dhashë gjithçka. Lazio ishte një mundësi për mua. Jam vërtet i lumtur që e gjeta këtë ekip, erdhi në kohën e duhur dhe gjithmonë do ta mbaj në zemrën time”. Kështu thotë lamtumirën Pedro, sulmuesi i Lazios, bardhekaltërve përmes kanaleve zyrtare të klubit.

Duke hedhur një vështrim prapa në karrierën e tij, spanjolli më pas e përmend derbin e parë kundër Romës si momentin më domethënës të kohës së tij me bardhekaltërit: “Më lanë jashtë, ishte shumë e vështirë për mua. Doja të luaja një ndeshje të mirë për tifozët dhe për veten time. Shënova, fituam dhe festuam. Ishte diçka personale që më duhej, ishte momenti më domethënës që kam përjetuar këtu, edhe nëse ka pasur shumë të tjerë”, vazhdon Pedro.

Duke analizuar karrierën e tij, ai pranon se ka qenë “mjaft me fat që të ketë një karrierë të shkëlqyer dhe të fitojë trofe të rëndësishëm si Kupa e Botës dhe Liga e Kampionëve. Në fund të fundit, të luaj në këtë nivel ka qenë një privilegj për mua, ka qenë vërtet një udhëtim i mrekullueshëm. Pastaj, të përfundoj këtu te Lazio, një ekip me shumë histori. Jam shumë i lumtur, kam pasur një karrierë të mrekullueshme dhe i kam dhënë gjithçka”.

Së fundmi, një mendim për tifozët e Lazios: “Ata janë gjëja më e mirë e Lazios. Shpresoj që të gjendet një zgjidhje në të ardhmen, tani për tani, është një kohë e ndërlikuar dhe e vështirë për t’u menaxhuar mendërisht. Shpresoj që klubi dhe tifozët të jenë të gjithë së bashku përsëri një ditë. Do të vij në stadium shumë herë. Dhe jam i sigurt se një trofe do të vijë së shpejti, ata e meritojnë”, përfundon ai.