Një aksident ka ndodhur mesditën e sotme në aksin Krutje–Pushimi i Shoferit në Lushnjë, ku një automjet tip “Benz” ka dalë nga rruga dhe ka përfunduar në një kanal me ujë.

Drejtuesi i mjetit, i cili ndodhej në automjet së bashku me djalin e tij të mitur, dyshohet se ka humbur kontrollin e automjetit gjatë lëvizjes. Si pasojë, makina është përmbysur në kanalin anës rrugës që ishte me ujë.

Menjëherë pas ngjarjes, dy banorë të zonës kanë ndërhyrë për të ndihmuar nxjerrjen e personave që ndodheshin brenda mjetit. Falë reagimit të shpejtë, të dy personat kanë arritur të dalin nga automjeti pa lëndime serioze dhe jashtë rrezikut për jetën.

Në vendngjarje kanë mbërritur gjithashtu forcat zjarrfikëse, policia dhe ambulanca. Dy personat u transportuan drejt spitalit për kontrolle mjekësore dhe ekzaminime të mëtejshme.

Policia po punon për të sqaruar shkaqet e plota të aksidentit.

/rtsh.al/