Ministri i Infrastrukturës dhe Energjisë, Enea Karakaçi, ka reaguar me një mesazh prekës në rrjetet sociale pas lajmit të rëndë për vdekjen e elektricistit Bashkim Boçi, i cili humbi jetën ndërsa punonte në Himarë për rikthimin e energjisë.

Teksa shpreh dhimbjen dhe ngushëllimin për familjarët, Karakaçi bën me dije se 54-vjeçari Bashkim Boçi ishte pjesë e OSSH Elbasan që prej vitit 2000.

“Me dhimbje të thellë mora lajmin për humbjen e jetës së kolegut tonë, Bashkim Boçi, i cili ra në krye të detyrës, ndërsa ishte i angazhuar në riparimin e defekteve të shkaktuara nga moti i keq në zonën e Himarës,” shkruan ministri. 

Karakaçi theksoi se pas çdo rikthimi të energjisë , qëndron puna e vështirë dhe e rrezikshme e punonjësve të OSSH-së, të cilët shpesh sakrifikojnë jetën e tyre për shërbimin ndaj komunitetit.

“Bashkimi ishte pjesë e OSSH Elbasan që prej vitit 2000 dhe e ushtroi detyrën me përkushtim dhe profesionalizëm deri në momentin e fundit. Ngushëllimet më të sinqerta familjes, të afërmve dhe kolegëve të tij. Ndajmë dhimbjen me ta në këtë moment të vështirë dhe nderojmë me mirënjohje kontributin dhe sakrificën e Bashkim Boçit në shërbim të qytetarëve. U prehtë në paqe,” vijon mesazhi i tij. 

/rtsh.al/