Blutë e Tiranës kanë arrestuar në flagrancë shtetasen B. H., 32 vjeçe, me detyrë edukatore në një kopsht privat.

Sipas Policisë, 32-vjeçarja dyshohet se ka ushtruar dhunë fizike ndaj një fëmije 2-vjeçar në ambientet e kopshtit ku ishte e punësuar.

Pas denoncimit dhe veprimeve të kryera nga shërbimet policore, u bë arrestimi në flagrancë i edukatores, ndërsa materialet procedurale i kaluan Prokurorisë për veprime të mëtejshme, me qëllim zbardhjen e plotë të rrethanave të ngjarjes.

Bëhet me dije se në polici denoncimi është bërë nga babai i fëmijës pasi ka parë shenjat e dhunës në fytyrën e 2-vjeçarit.

Fillimisht ai e ka dërguar fëmijën në spital dhe i janë bërë ekzaminimet. I mituri kishte një të nxirë tek faqja dhe shenja skuqje tek veshët.

Ndërkohë, gjatë marrjes në pyetje 32-vjeçarja, ka deklaruar se fëmijën e ka gjuajtur me shpullë pasi nuk po e zinte gjumi dhe nuk po e duronte dot. Sipas burimeve, edhe nga pamjet filmike ka rezultuar që edukatorja 32-vjeçare ka ushtruar dhunë fizike ndaj fëmijës 2 vjeçar.

/rtsh.al/