Një tërmet i fuqishëm me magnitudë 7.7 goditi Panamanë të premten, duke shkaktuar dëme materiale, panik te banorët dhe evakuime në disa zona të vendit. Lëkundjet u ndjenë edhe në kryeqytetin Panama City, ku qytetarët dolën me nxitim në rrugë për t’u larguar nga ndërtesat.

Sipas Shërbimit Gjeologjik të Shteteve të Bashkuara (USGS), tërmeti kishte epiqendrën pranë bregdetit jugor të Panamasë, në një thellësi prej rreth 12.6 kilometrash. Zona e goditur ndodhet pranë komunitetit rural Pitaloza Arriba, në provincën Herrera.

Pas tërmetit kryesor u regjistruan dhjetëra pasgoditje, ndërsa autoritetet nisën kontrollet për të përcaktuar shkallën e dëmeve dhe pasojat për banorët.

Dëmet më të dukshme u raportuan në provincat qendrore të Veraguas, Herrera dhe Los Santos. Disa banesa pësuan çarje, ndërsa u raportuan dëmtime edhe në ndërtesa historike dhe objekte të tjera publike. Lëkundjet shkaktuan gjithashtu ndërprerje të energjisë elektrike në disa provinca.

Sipas raportimeve paraprake, të paktën 27 persona ishin lënduar, ndërsa nuk raportohet për viktima.

Pas tërmetit, autoritetet ndërkombëtare lëshuan paralajmërime për rrezik cunami në disa zona bregdetare të Amerikës Qendrore dhe Jugore, përfshirë Panamanë, Kolumbinë, Kosta Rikën, Ekuadorin, Perunë dhe vende të tjera të rajonit.

Megjithatë, Sistemi Amerikan i Paralajmërimit për Cunami njoftoi më vonë se kërcënimi kishte kaluar dhe se nuk kishte më rrezik të mëtejshëm nga cunami.

Tërmeti solli ndërprerje të përkohshme edhe në transport. Aeroporti Ndërkombëtar Tocumen, një nga nyjet kryesore ajrore të rajonit, pezulloi përkohësisht fluturimet, të cilat më pas rifilluan.

Ndërkohë, Kanali i Panamasë, një nga korridoret më të rëndësishme të tregtisë detare botërore, nuk raportoi probleme në funksionimin e tij.

/rtsh.al/