Ish-lideri i Partisë Laburiste në Britaninë e Madhe, Neil Kinnock, beson se Andy Burnham synon ta rikthejë Mbretërinë e Bashkuar në Bashkimin Europian. Në një intervistë për gazetën italiane La Repubblica, Kinnock u shpreh se Burnham është një proeuropian i përkushtuar dhe se synimi i tij është rivendosja e anëtarësimit të Britanisë në BE. Deklarata vjen pasi Burnham, gjatë një seance me deputetët, u pyet nëse rishikimi i marrëdhënieve mes Britanisë dhe Bashkimit Europian, që ai ka propozuar, mund të çojë në një ribashkim të plotë.

Megjithatë, Kinnock, i cili është një nga mentorët politikë të Burnham, nuk shfaqi të njëjtën rezervë kur u pyet për qëndrimin e tij ndaj Europës. “Andy bën deklaratën e vendosmërisë së tij për të ndryshuar marrëdhënien dhe është e qartë se qëllimi i tij është të bashkohet përsëri”, deklaroi Kinnock.

I pyetur nëse beson se Burnham do të jetë personi që do ta rikthejë Britaninë e Madhe në Bashkimin Europian, ish-lideri laburist u përgjigj pa hezitim: “Po, sigurisht. Angazhimi i tij është autentik. Ai vërtet e kupton që nga baza pse rivendosja e asaj që unë e konsideroj si normalitet në kontinentin tonë është jetike për çdo palë ekonomikisht, politikisht, kulturorisht, të gjitha në aspektin e sigurisë, dhe është në gjendje ta artikulojë këtë në një gjuhë që njerëzit mund ta kuptojnë. Pra, po, ai padyshim që e kupton.”

Gjatë intervistës, Kinnock u pyet edhe nëse Burnham e kishte minimizuar qëllimisht qëndrimin e tij për rishikimin e rezultatit të referendumit të Brexit gjatë fushatës zgjedhore në Makerfield. Sipas tij, Burnham nuk ka ndryshuar drejtim, por thjesht ka zgjedhur momentin e duhur për të diskutuar çështjen europiane.

“Andi nuk ka ndryshuar drejtim. Ai ka qenë gjithmonë një proeuropian i përkushtuar. Në zgjedhjet e pjesshme, me të drejtë nuk bëri zhurmë për këtë. Ky është debati i nesërm. Thjesht sepse zgjedhjet e pjesshme nuk kishin të bënin me Europën. Kishin të bënin me fitoren në Makerfield në mënyrë që ai të bëhej udhëheqës i partisë. Kjo është e gjitha për të cilën bëhej fjalë”, u shpreh Kinnock.

/rtsh.al/