Komisioneri Shtetëror i Zgjedhjeve shqyrtoi në seancën e sotme publike kërkesën e nismës ligjvënëse të zgjedhësve për shtyrjen e afatit për mbledhjen e nënshkrimeve mbështetëse. Kjo nismë lidhet me propozimin për ndryshime dhe shtesa në Kodin Zgjedhor të Republikës së Shqipërisë.

Në përfundim të shqyrtimit, Komisioneri vendosi pranimin e kërkesës dhe shtyrjen e afatit të mbledhjes së firmave mbështetëse nga zgjedhësit deri më 15 dhjetor 2026.

“Komisioneri vendosi zgjatjen e afatit për mbledhjen e nënshkrimeve mbështetëse për propozimin e projektligjit ‘Për disa shtesa dhe ndryshime në ligjin nr. 10019, datë 29.12.2008 ‘Kodi Zgjedhor i Republikës së Shqipërisë’, i ndryshuar’, deri në datën 15 dhjetor 2026.”, thuhet në njoftim.

Plotësimi i vakancave në tre këshilla bashkiakë

Gjatë të njëjtës seancë publike, Komisioneri Shtetëror i Zgjedhjeve miratoi edhe vendimet për plotësimin e vakancave të krijuara në tre këshilla bashkiakë në vend:

Këshilli i Bashkisë Gjirokastër, mandati i kalon kandidates së “Partisë Socialiste të Shqipërisë”, zj. Nesilda Batha.

Këshilli i Bashkisë Korçë, mandati i kalon kandidates së Partisë “Aleanca Arbnore Kombëtare”, zj. Sara Dinellari.

Këshilli i Bashkisë Lushnjë, mandati i kalon kandidates së “Partisë Socialiste të Shqipërisë”, zj. Klajda Meço.

/rtsh.al/