Bota e artit dhe e kinematografisë botërore është në zi pas ndarjes nga jeta të një prej aktorëve më të mëdhenj të kohës sonë, Sir Patrick Stewart.

Aktori i njohur britanik, i adhuruar nga miliona fansa anembanë globit për rolet e tij monumentale në “Star Trek” dhe “X-Men”, u nda nga jeta të mërkurën në moshën 86-vjeçare, në shtëpinë e tij në Los Anxhelos.

Lajmi i hidhur u konfirmua të enjten përmes një njoftimi zyrtar në llogaritë e tij në rrjetet sociale, ku u bë e ditur se humbja e tij erdhi pas një beteje të vështirë me sëmundjen e Alzheimerit dhe Demencën.

Sipas deklaratës së publikuar nga familja, në orët e tij të fundit Sir Patrick ishte i rrethuar nga dashuria e njerëzve të tij më të afërt dhe u nda nga jeta në kujdesin e dashur të bashkëshortes së tij të shtrenjtë, Sunny.

Në njoftim thuhet se ai u mbajt në përqafimin e ngrohtë të familjes dhe miqve, i rrethuar nga muzikë e gjallë, lutje, lot, të qeshura dhe ai lloj emocioni i thellë që vetëm ai mund të frymëzonte pas një jetë të pashterur përkushtimi ndaj nesh të gjithëve.

Përjetë do të ruhet në kujtesë qetësia dhe reflektimi në fytyrën e tij, si një kujtesë e paharrueshme e hijeshisë së tij të pamposhtur.

I lindur në Mirfield, në West Riding të Yorkshire të Britanisë së Madhe, Sir Patrick Stewart ndërtoi një nga karrierat më të respektuara dhe të gjata në historinë e artit skenik dhe kinematografik.

Rrugëtimi i tij artistik nisi në skenat prestigjioze të Trupës Mbretërore të Shekspirit, ku ai dëshmoi talentin e tij të rrallë në interpretimin e dramave klasike.

Gjatë një karriere që përfshin gjashtë dekada, ai arriti të fitojë zemrat e audiencave të të gjitha brezave, duke u shndërruar në një simbol të artit përmes roleve të paharruashme si Kapiteni Jean-Luc Picard në serialin kult Star Trek: The Next Generation, Profesor Charles Xavier në serinë e filmave X-Men, si dhe përmes interpretimeve të tij mjeshtërore në teatër dhe në skenat e Broadway-it.

Për kontributin e tij të jashtëzakonshëm në art dhe kulturë, ai u kurorëzua me titullin e lartë Kalorës nga Mbretëresha Elizabeth II në vitin 2010.

Ndarja nga jeta e Sir Patrick Stewart lë një boshllëk të pazëvendësueshëm në botën e aktrimit, por trashëgimia e tij artistike, zëri i tij unik dhe shpirti i tij fisnik do të mbeten të paharruara përtej kohës.

/rtsh.al/