Sofo dhe Dhurata, bashkëshortët të cilët administrojnë një agroturizëm në Tragjas të vjetër të Vlorës ishin të ftuar të kryeministrit Edi Rama në episodin 2 të sezonit 4 të Podkastit “Flasim”. 

Çifti i ka ndërtuar bujtinat me materiale ekologjike, kashtë dhe dru, duke e bërë të prekshme çdo detaj të jetesës në mal.

Kryeministri Rama i ftoi ata të aplikojnë për të përfituar nga programi “Paketa e Maleve”, për të zgjeruar më tej aktivitetin e tyre. Kreu i qeverisë bëri të ditur se shumë shpejt do të shpallet edhe një mbështetje të re financiare.

“Agroturizmi nuk ka taksa. TVSH e kemi bërë për agroturizmin 6%. Ne tani kemi një program të ri që do ta shpallim së shpejti që do të japim mbështetje financiare për këto lloj aktivitetesh. Ju e merrni menjëherë atë mbështetje financiare. Është një mbështetje e kombinuar kredi e butë me grante”, tha Rama.

Kryeministri ripërsëriti apelin për emigrantët që të kthehen të jetojnë në Shqipëri, ndërsa rikujtoi kostot e jetesës jashtë.

Fusha e agroturizmit në Shqipëri ka filluar të tërheqë gjithnjë e më shumë turistë të huaj, duke ndikuar dhe në rritjen e kontributit të këtij sektori në industrinë e turizmit në vend.

/rtsh.al/