Ndërsa Brazili po përgatitet për raundin e dytë të zgjedhjeve presidenciale më 25 tetor, fati i garës nuk mbetet vetëm në duart e mbështetësve të zjarrtë. Miliona votues të pavendosur dhe qytetarë që abstenuan në raundin e parë pritet të jenë faktori vendimtar mes presidentit të së majtës, Luiz Inácio Lula da Silva, dhe senatorit të së djathtës, Flávio Bolsonaro.

Sipas të dhënave zyrtare, më shumë se 33 milionë brazilianë — ose 21% e elektoratit — nuk morën pjesë në votimet e raundit të parë, shifra më e lartë e abstenimit që nga viti 1998.

Mosbesim historik dhe pakënaqësi ekonomike

Shumë votues të rinj dhe qytetarë ndihen të anashkaluar nga të dyja krahët e spektrit politik, të mbingarkuar nga skandalet e korrupsionit dhe polarizimi ekstrem.

Ndërsa Flávio Bolsonaro përballet me hetime për korrupsion, babai i tij, ish-presidenti Jair Bolsonaro, po vuan një dënim prej 27 vitesh burg për tentativë për grusht shteti. Nga ana tjetër, Lula u burgos për 19 muaj me akuza korrupsioni që më vonë u anuluan, por që lanë gjurmë te opinioni publik.

Kostoja e jetesës mbetet një nga faktorët kryesorë të pakënaqësisë. Çmimi i karburantit është rritur nga 5 reais (1 dollar) për litër në janar 2023 në 6.54 reais (1.31 dollarë) në shtator 2026.

Balotazh i ngushtë, avantazhi i lehtë i djathtës

Në raundin e parë, asnjë nga kandidatët nuk arriti të merrte më shumë se 50% të votave. Flávio Bolsonaro hyn në raundin e dytë me një avantazh prej rreth 2 milionë votash më shumë se Lula. Gjithashtu, kandidatët e eliminuar në vendin e tretë, të katërt dhe të pestë i përkasin të gjithë krahut të djathtë.

“Ne flasim shumë për polarizimin në Brazil, por harrojmë përqindjen më të lartë të njerëzve që nuk e pëlqejnë këtë luftë,” shprehet Carolina Almeida de Paula, shkencëtare politike nga Universiteti Shtetëror i Rio de Janeiros.

Instituti i sondazheve Datafolha vlerësoi se rreth 11% e votuesve ishin të pavendosur përpara raundit të parë, krahasuar me vetëm 2% në të njëjtën periudhë të vitit 2022. Mbajtja e një numri të madh të fletëvotimeve të bardha ose të pavlefshme tregon se fushata e dy javëve të ardhshme do të jetë një përpjekje agresive për të bindur elektoratin gri.

/rtsh.al/