Ish-kryeministri dhe kreu i Partisë Demokratike, Sali Berisha, ka reaguar ashpër ndaj legjislaturës së re parlamentare, duke e cilësuar atë si “ditën më të zezë në historinë e parlamentarizmit shqiptar”.

Në një prononcim për mediat, të mbajtur jashtë mjediseve të Kuvendit, Berisha theksoi se parlamenti aktual është thjesht “një institucion privat i Ramaduros dhe klaneve të drogës”, duke akuzuar kryeministrin Edi Rama për shkelje të rënda kushtetuese në lidhje me menaxhimin e mandateve të deputetëve.

Më tej Berisha deklaroi se “ne e konsiderojmë absolutisht të paligjshëm këtë parlament, dhe beteja jonë nuk falet gjer në ditën e fitores tonë mbi të”, ndërsa vuri në dukje se hyrja e tij në Kuvend nuk do të thotë pranim i legjitimitetit të tij, por një hap i domosdoshëm në betejën politike kundër asaj që ai e quajti “shkelmim me dy këmbë të Kushtetutës”.

Në qendër të kritikave të Berishës ishte mënyra, sipas tij, sesi qeveria ka trajtuar dorëzimin e mandateve nga disa deputetë, duke e bërë atë jashtë institucionit parlamentar.

“Mandati nuk dorëzohet rrugëve. Kjo tregoi se parlamenti është thjesht një institucion privat i Ramaduros dhe klaneve të drogës”, tha deklaroi Berisha.

Ai shpjegoi se çdo deputet i zgjedhur është i detyruar me ligj, Kushtetutë dhe rregullore të kryejë betimin në parlament para se të dorëzojë mandatin.

“Kurrë pazaret me mandatin nuk bëhen rrugëve. Çdo i zgjedhur në ato lista, është i detyruar me ligj, me kushtetutë, me rregullore, të vijë të bëjë betimin dhe pastaj është i lirë të dorëzojë mandatin,” theksoi Berisha.

“Ata nuk kanë ligj, nuk kanë rregullore, nuk kanë kushtetutë, këta kanë vetëm drogë dhe para, para dhe drogë. Kjo është historia e tyre”, akuzoi ai.

Berisha nuk u ndal vetëm te procedurat, por e zgjeroi kritikën te natyra e të gjithë parlamentit.

“Sot çelet parlamenti duke shkelmuar kushtetutën, duke shkelmuar parimet themelore të saj, mbi mandatet”, deklaroi ai, duke e quajtur sesionin e sotëm “ditën më të zezë në historinë e parlamentarizmit shqiptar”.

/rtsh.al/