Aksi rrugor Kakavijë-Janinë do të jetë sot i bllokuar për gjashtë orë. Lajmi është njoftuar nga Policia Kufitare greke, e cila ka bërë me dije se bllokimi nga ora 12:00 deri në orën 18:00 (me orën greke) për qarkullimin e mjeteve, lidhet me protestën që do të zhvillojnë fermerët.

Policia Kufitare sqaron ndërkaq, se do të lejohen për qarkullim vetëm automjetet që do të kenë emergjenca shtetërore.

 “Kakavijë/ Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar nga Policia Kufitare Greke se ditën e sotme, nga ora 12:00 deri në orën 18:00 (me orën greke), aksi rrugor Kakavijë–Janinë, në fshatin Kallpaq, do të jetë i bllokuar për shkak të protestës që do të zhvillojnë fermerët.

Do të lejohen të qarkullojnë vetëm automjetet që do të kenë emergjenca shëndetësore.

Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës”, thuhet në njoftim.

/rtsh.al/