Ministri i Drejtësisë, Toni Gogu, ka zhvilluar takimin e parë zyrtar me kryesinë e re të Dhomës Kombëtare të Avokatisë. Ky takim vjen fill pas nënshkrimit nga ana e Shqipërisë të Konventës së Këshillit të Europës për Mbrojtjen e Profesionit të Avokatit, një instrument ndërkombëtar që synon të konsolidojë garancitë për ushtrimin e lirë dhe të pavarur të këtij profesioni.

Sipas ministrit, bashkëpunimi institucional midis Ministrisë së Drejtësisë dhe Dhomës së Avokatisë përbën një kusht themelor për funksionimin e rregullt të të gjithë sistemit ligjor në vend.

Zbatimi i Konventës dhe ndihma juridike falas

Gjatë bashkëbisedimit, palët u ndalën në hapat konkretë që do të ndërmerren për jetësimin e parimeve të Konventës Evropiane, zgjerimin e skemës së ndihmës juridike falas për shtresat në nevojë, si dhe koordinimin në kuadër të reformës në drejtësi.

Për realizimin e këtyre objektivave, palët ranë dakord për ngritjen e një strukture të posaçme operacionale. Përmes një mesazhi të publikuar në rrjetet sociale, Gogu specifikoi detajet e këtij dakordësimi:

“Diskutuam hapat e ardhshëm: zbatimin e Konventës, forcimin e ndihmës juridike falas dhe bashkëpunimin konkret në kuadrin e reformës së drejtësisë. Dakordësuam një grup pune të përbashkët me mandat dhe afat të qartë. Bashkëpunimi midis Ministrisë dhe Dhomës nuk është mirësjellje institucionale — është kusht i funksionimit të sistemit të drejtësisë.”

Avokatura si shtyllë e shtetit të së drejtës

Në vlerësimin e ministrit të Drejtësisë, pavarësia e figurës së avokatit nuk duhet parë si një status preferencial për vetë profesionistët, por si një mekanizëm mbrojtës në shërbim të publikut dhe të drejtave të qytetarëve.

“Avokatura e pavarur nuk është privilegj i një profesioni. Ajo është pjesë e arkitekturës së shtetit të së drejtës dhe garanci konkrete për çdo qytetar që kërkon mbrojtje, përfaqësim dhe akses në drejtësi. Kur avokati punon i lirë, fiton qytetari — jo profesioni”, nënvizoi ministri Gogu.

Grupi i ri i punës pritet të fillojë funksionimin brenda afateve të përcaktuara për të hartuar draftet dhe rregulloret e nevojshme për implementimin e angazhimeve të reja ligjore.

/rtsh.al/