Mbrojtësi i krahut ka prishur marrëdhënien me Al Hilal të Simone Inzaghi. Problemi i vetëm për zikaltrit është paga e lartë e portugezit.

Do të ishte një rikthim i bujshëm në Itali për Joao Cancelo, edhe pse gjithçka duket e vështirë. Për momentin është një pistë merkatoje, sipas “Gazzetta dello Sport”. Me dëmtimin e Denzel Dumfries, trajneri Chivu ka nevojë për mbushur boshllëkun e krijuar në krahun e djathtë, sepse holandezi do të mungojë gjatë.

Joao Cancelo, i cili ka luajtur për Interin në sezonin 2017-18, ka prishur raportin me Simone Inzaghi, trajnerin e Al-Hilal. Klubi arab, ku portugezi ka kontratë deri në qershor të 2027-ës, e ka nxjerrë në merkato. Në këtë situatë, Interi dhe mbrojtësi mund të ribashkohen.

Kuptohet që pengesa e madhe është paga e lartë. Cancelo fiton 15 milionë euro neto në sezon, një shifër e paarritshme për Interin në këtë kohë, si dhe për çdo klub italian. Zikaltrit mund të punojnë në formulën e huazimit, me pagën të ndarë përgjysmë.

Lojtari portugez, sipas njerëzve pranë tij, nuk ka përparësi anën ekonomike, ai dëshiron të luajë në nivel të lartë dhe të kthehet në Europë.