Një 22-vjeçar është vënë në pranga nga Policia e Tiranës pas një konflikti të dhunshëm të regjistruar në zonën e Bathores, i cili ka përfshirë përdorimin e armëve të zjarrit dhe përplasjen e qëllimshme të automjeteve.

Sipas njoftimit zyrtar të Drejtorisë Vendore të Policisë, ngjarja ka ndodhur për motive të dobëta mes disa personave. Specialistët për Hetimin e Krimeve të Rënda pranë Komisariatit Nr. 5 arrestuan në flagrancë shtetasin me iniciale A. E., 22 vjeç. Dinamika e ngjarjes tregon se i dyshuari fillimisht ka goditur me automjetin e tij makinën që drejtohej nga shtetasi B. J., 33 vjeç.

Konflikti ka përshkallëzuar më tej kur 22-vjeçari dyshohet se ka qëlluar me armë zjarri në ajër me qëllim kanosjen e 33-vjeçarit. Pas këtij episodi, i dyshuari, i ndihmuar edhe nga persona të tjerë, ka ushtruar dhunë fizike duke goditur me grushte viktimën e këtij rasti.

Në vendngjarje kanë mbërritur menjëherë forcat e rendit, të cilat kanë bërë të mundur neutralizimin e situatës dhe ndalimin e autorit kryesor. Në cilësinë e provës materiale, autoritetet kanë sekuestruar automjetin tip “Range Rover” që ishte në pronësi të 22-vjeçarit.

Policia njofton se operacioni është ende në zhvillim. Aktualisht po vijojnë kërkimet në terren për gjetjen e armës së zjarrit të përdorur gjatë konfliktit, si dhe po punohet intensivisht për identifikimin, lokalizimin dhe ndalimin e personave të tjerë që kanë marrë pjesë në dhunën fizike ndaj 33-vjeçarit.

Dosja hetimore i ka kaluar Prokurorisë së Tiranës për procedurat e mëtejshme ligjore.

/rtsh.al/