Në intervistën e saj të hollësishme me gazetën Corriere della Sera, kryeministrja italiane Giorgia Meloni iu referua, ndër të tjera, takimit midis Presidentit të SHBA-së Donald Trump dhe Presidentit ukrainas Volodymyr Zelensky brenda Bazilikës së Shën Pjetrit dhe theksoi se “Unë besoj se ishte një moment veçanërisht pozitiv i cili, sipas asaj që më thanë të dy udhëheqësit, mund të ketë qenë një pikë kthese. Ndoshta ishte dhurata e fundit që na dha Papa Françesku.”

Duke iu referuar mundësisë së organizimit të një konference Bashkimi Evropian-Shtetet e Bashkuara në Itali, Meloni shtoi se “Unë besoj se Aleanca Atlantike duhet të forcohet. Jo vetëm ushtarakisht, por duke iu referuar kësaj pike, theksoj se është e drejtë që Evropa të kontribuojë më fuqishëm në sigurinë e saj, sepse ose mbrohemi vetëm ose nuk mund të besojmë se jemi të sigurt në një botë që po ndryshon me shpejtësi marramendëse.“

Sipas Melonit, BE-ja dhe SHBA-ja duhet të afrohen, sepse, ndërkohë, fuqi të tjera po fitojnë terren, duke synuar të mbizotërojnë në ekuilibrat ndërkombëtarë.

“Nuk mendoj se kjo është në interes as të Evropës, as të Shteteve të Bashkuara.“

Sipas kryeministres italiane, vendi i saj mund të punojë për të afruar dy anët e Atlantikut, në mënyrë që Perëndimi të forcohet si qytetërim dhe jo vetëm si një hapësirë ​​gjeografike apo grup interesash.

“Shtetet e Bashkuara janë ankuar prej kohësh për suficitin tregtar evropian, por duhet të themi se ekziston edhe një suficit amerikan me Evropën në shërbime dhe se evropianët investojnë më shumë në Shtetet e Bashkuara sesa këtu.“

“Kjo është arsyeja pse jam e bindur se është e nevojshme dhe e mundur të gjejmë një gjuhë të përbashkët”, thekson kryeministrja italiane në intervistën e saj me Corriere della Sera.

Kreu i qeverisë së Romës beson gjithashtu se sfida e përgjithshme që paraqesin Shtetet e Bashkuara mund të jetë edhe një mundësi për evropianët, në kuptimin që “ne do të jemi në gjendje të vëmë në pikëpyetje veten, të ndërmarrim veprime, të kthehemi në supremacinë e politikës dhe t’i japim Evropës shtytjen vendimtare që i nevojitet”.

“Ne mbetemi në anën e Ukrainës”

Së fundmi, duke iu referuar çështjes së Ukrainës, Georgia Meloni deklaroi: “Ne mbetemi në anën e Ukrainës, e cila pa mbështetjen e Perëndimit nuk do të ishte në gjendje të mbronte lirinë e saj.

Ne tani mbështesim përpjekjet e Trump dhe jemi të kënaqur që Zelensky ka deklaruar gatishmërinë e tij për të pranuar një armëpushim pa kushte, duke demonstruar se edhe Ukraina dëshiron paqe. Tani Rusia duhet të vërtetojë të njëjtën gjë.

Sepse armëpushimi tre-ditor i shpallur nga Putini për përvjetorin e fitores në Luftën e Dytë Botërore është diçka e ndryshme, gjë që nuk është e mjaftueshme.”

/rtsh.al/