Ministri i Shtetit për Marrëdhëniet me Parlamentin, Toni Gogu, zhvilloi një takim pune me anëtarë të rëndësishëm të Parlamentit Evropian (PE), përfshirë Marco Tarquinio-n, bashkëkryetar i Komitetit Parlamentar të Stabilizim-Asociimit BE-Shqipëri, dhe Andreas Schieder, Raportuesin e PE për Shqipërinë. Takimi vlerësoi përkushtimin e ndërsjellë për forcimin e dialogut politik dhe avancimin e procesit të integrimit evropian të Shqipërisë.

Ministri Gogu vlerësoi lartë rolin qendror të anëtarëve të PE-së si “miq të Shqipërisë” në këtë proces, duke theksuar se qeveria dhe Parlamenti po punojnë intensivisht për të përmbushur pikat afatmesme të integrimit.

Fokusi i palëkundur te objektivi 2027

Ministri Gogu foli edhe për agjendën e brendshme pas mandatit të fituar në zgjedhjet e fundit.

“Nuk do të humbim asnjë sekondë për t’u shfokusuar nga agjenda evropiane. Ambicia jonë është e madhe për masën e madhe të ligjeve që duhen miratuar për të qenë gati për vitin 2027,” theksoi Gogu, duke lënë të kuptohet se fokusi do të jetë te përmbushja e standardeve teknike të nevojshme për anëtarësimin.

Lidhur me marrëdhëniet me opozitën, Gogu theksoi se ndonëse palët kanw njw drejtim “destinacionin evropian të Shqipërisë”, ato ndryshojnë në mënyrën e arritjes së tij.

“Ne do merremi me standardet dhe se si arrihen ato standarde por jo me individët,” u shpreh Gogu, duke lënë të nënkuptohet një qasje e fokusuar tek reforma konkrete dhe jo tek konfliktet personale.

Ai njoftoi se Parlamenti ka funksionuar aktivisht me opozitën, duke ngritur dy komisione thelbësore: atë për reformën zgjedhore dhe atë për reformën territoriale.

Ministri Gogu ritheksoi bindjen se Kuvendi është hapësira e duhur për opozitën për të kritikuar politikat qeveritare, por jo për të vënë në shënjestër individë në krye të institucioneve. Si shembull, ai theksoi: “Opozita mendon se i bën nder reformës në drejtësi duke i bërë gjyqin një kryeprokurori.”

Në fund, Gogu konfirmoi se Kuvendi luan një rol qendror jo vetëm në mbikëqyrjen e reformave, por edhe në ecurinë e negociatave të anëtarësimit me Bashkimin Evropian.

/rtsh.al/