Situata e emergjencës në lagjen Pepaj, pjesë e fshatit Gojan i Madh në Bashkinë e Pukës, po shkon drejt përmirësimit pas orëve të tëra operacionesh intensive për izolimin e flakëve. Sipas të dhënave zyrtare të përditësuara nga Prefektura e Qarkut Shkodër, përpjekjet e përbashkëta të strukturave vendore, ushtarake dhe banorëve të zonës kanë bërë të mundur parandalimin e djegies së banesave të banuara.

Nga bilanci përfundimtar i dëmeve në këtë zonë konfirmohet se janë djegur 3 banesa të braktisura, ndërsa falë krijimit të brezit mbrojtës nga forcat e zjarrfikësve u bë e mundur mbrojtja e 2 banesave ku strehoheshin familje.

Mobilizim masiv në aksin Gojan–Gjegjan–Tërbun

Për përballimin e vatrave aktive në të gjithë zonën e Pukës është ngritur një rrjet i gjerë koordinimi logjistik dhe njerëzor, ku marrin pjesë efektivë nga disa bashki fqinje dhe struktura qendrore.

Përveç ndërhyrjes nga toka, operacioni po mbështetet në mënyrë të pandërprerë nga ajri me një helikopter të Forcave të Armatosura për të neutralizuar vatrat më të thepisura.

“Prefektura e Qarkut Shkodër, në koordinim me Bashkinë Pukë, Agjencinë Kombëtare të Mbrojtjes Civile dhe të gjitha strukturat e sistemit të Mbrojtjes Civile, vijon koordinimin e operacionit për izolimin dhe shuarjen e vatrave. Forcat mbeten të angazhuara në terren, me prioritet mbrojtjen e jetës së banorëve, banesave dhe parandalimin e riaktivizimit të vatrave,” bën me dije njoftimi zyrtar i Prefekturës.

Strukturat e mbrojtjes civile do të vijojnë të qëndrojnë në gatishmëri përgjatë gjithë natës për të monitoruar terrenin dhe për të parandaluar çdo vatër që mund të riaktivizohet nga era.

/rtsh.al/