Trajneri i Kombëtares, Silvinjo ka vlerësuar të besuarit e tij pas suksesit 4-2 në miqësoren përballë Jordanisë. “Një dhimbje koke e mirë”, ka theksuar trajneri kuqezi për alternativat e shumta dhe formën e mirë që gëzojnë lojtarët në këto momente.

“Dajsinani ka bërë një paraqitje të mirë. Gripshi, i cili te skuadra e tij luan më afër sulmit, ndërsa te ne luan si mesfushor, por në fakt në karakteristikat e tij është një lojtar që futet në zonë dhe e gjen golin. Ndërkohë, edhe lojtarët e tjerë sot kanë bërë shumë mirë: Bajrami, Hoxha, Broja që ishte në një pozicion ndryshe, Daku… Janë lojtarë që përfitojnë nga hapësira që u krijohen dhe japin më të mirën. Janë dhimbje koke shumë pozitive për trajnerin në këtë rast”.

“E kam thënë, Kombëtarja është e hapur për të gjithë. Kemi një listë me lojtarët që i ndjekim dhe mund të ketë afrime. Duhet të luajnë, të bëjnë mirë e pastaj të shikojmë, por jam i lumtur për të gjithë”.

“Hoxha? Po bën një punë të mirë me skuadrën e tij. Para 10 ditësh kishte një dëmtim të lehtë. E thirrëm, ai erdhi dhe bëri një punë të mirë, nuk mungoi në asnjë stërvitje. Me Serbinë hyri mirë, sot bëri një ndeshje të kompletuar”.