Të paktën 16 të rinj kanë humbur jetën në një aksident të rëndë në Kolumbi, pranë komunës së Segovias në verilindje të vendit. Ngjarja ndodhi në një rrugë që lidh qytetin e Medellinit me bregdetin kolumbian.

Sipas autoriteteve lokale, një autobus që transportonte rreth 40 studentë të moshës 16 deri në 18 vjeç doli nga rruga për arsye ende të paqarta dhe u rrëzua në një shkëmb disa dhjetëra metra të lartë. Numri i viktimave u konfirmua nga guvernatori i rajonit Antioquia, Andrés Julián Rendón.

Nga aksidenti, 19 të rinj të tjerë mbetën të plagosur dhe po marrin trajtim mjekësor në dy spitale në qytetet e afërta të Segovias dhe Remedios. Autoritetet kanë nisur hetimet për të zbardhur shkaqet e aksidentit, ndërsa ekipet e emergjencës kanë qenë në vendngjarje për të ndihmuar të mbijetuarit.

Ngjarja ka tronditur opinionin publik në Kolumbi dhe ka nxitur reagime ngushëllimi nga autoritetet dhe komuniteti lokal.

/rtsh.al/