Një nga momentet më të fuqishme artistike të kësaj mbrëmje të Fest 64 erdhi nga kantautori Vlashent Sata, i ftuari special që solli në skenë një performancë drithëruese dhe të mbushur me ndjenjë. Ai interpretoi këngën “Duart lartë”, një krijim i lindur nga një imazh dramatik që e ka ndjekur gjatë.

Sata tregoi se kënga është frymëzuar nga një skenë e vetme, por e paharrueshme.

“Kjo këngë ka lindur nga një imazh që e ke parë një herë të vetme. Ishte imazhi i një ushtari që kishte mbështetur pushkën në trupin e një djali 9 apo 10 vjeç. Djali në gjunjë, me dorën në plagë, thërret të atin derisa shtrihet dhe mbaron. Ishte një imazh që nuk më la të fle. U ngrita dhe e shkruajta këtë këngë,” rrëfeu ai.

Artisti shtoi se historia e këngës lidhet edhe me kujtesën kolektive të shqiptarëve.

“Ne vijmë nga një gjenocid i joni në Kosovë, vijmë nga ’97 dhe është absurde që lufta të jetë akoma aktualitet në 2025,” tha Sata, duke theksuar mesazhin e fortë human dhe antidhunë që mbart kënga.

Performanca e tij u prit me duartrokitje të gjata, duke u shndërruar në një nga kulmet emocionale të natës në Fest 64.

/rtsh.al/