RTSH ka monitoruar nga afër procesin e mbërritjes së votave të diasporës nga Aeroporti i Rinasit deri te transportimi i tyre me automjetin e DHL-së drejt ambientit të Parkut Olimpik, ku është ngritur KZAZ-ja e posaçme që po e administron këtë proces të veçantë për diasporën, të realizuar për herë të parë në Shqipëri.

Përfaqësuesit e partive politike, Marash Logu nga Partia Demokratike dhe Elena Xhino nga Partia Socialiste e ndoqën nga afër procesin.

Ngarkesa e dytë, me mbi 3.200 pako me fletë votimi, e ka çuar në rreth 4.000 numrin total të votave të emigrantëve, që tashmë e kanë shprehur vullnetin e tyre.

Pas skanimit dhe ndarjes sipas qarqeve përkatëse, zarfet e depozituara në Parkun Olimpik do të qëndrojnë aty deri në përfundimin e zgjedhjeve të 11 majit. Numërimi i votave do të zhvillohet gjithashtu në të njëjtin ambient. 

Sipas të dhënave të KQZ-së, mbi 58 mijë zarfe janë marrë në dorëzim nga qytetarët, që do të shprehin vullnetin e tyre në ditët në vijim për parlamentaret. Ndërkohë, pjesa e mbetur e zarfeve me fletë votimi po përgatitet nga administrata e KQZ-së.

Edhe për qarqet e Tiranës dhe Vlorës, që mbetën për në fund të procesit, ka nisur tashmë shpërndarja e fletëve të votimit.

Në total, rreth 250 mijë shqiptarë janë regjistruar për të votuar nga jashtë vendit.

I gjithë procesi po monitorohet nga kamerat e sigurisë, përfaqësuesit e partive politike dhe misionet ndërkombëtare.

Gazetare: Rugova Dunisha

/rtsh.al/