Kompania shtetërore e prodhimit të dokumenteve, IdentiTek, ka njoftuar se ditën e premte do të hapë dyert për qytetarët, pavarësisht ditëve të festave, për të përballuar fluksin e kërkesave.

Sipas njoftimit zyrtar, zyrat e aplikimit për karta identiteti dhe pasaporta do të jenë në shërbim nga ora 09:00 deri në orën 12:00.

Ky shërbim do të ofrohet në të 12 qarqet kryesore të vendit: Tiranë, Durrës, Elbasan, Shkodër, Vlorë, Fier, Korçë, Lezhë, Dibër, Berat, Kukës dhe Gjirokastër.

Në kryeqytet, shërbimi nuk do të ofrohet në të gjitha pikat, por specifikisht në dy zyra:

IdentiTek – pranë Njësisë Administrative Nr. 2

IdentiTek – pranë Njësisë Administrative Nr. 4

Një lehtësi e madhe për qytetarët është se në çdo zyrë që do të jetë e hapur gjatë këtij orari, ata mund të marrin shërbime pavarësisht se ku e kanë gjendjen civile.

IdentiTek sqaron se ky vendim është marrë për të lehtësuar fluksin e lartë gjatë festave të fundvitit dhe veçanërisht për t’iu përgjigjur nevojave të emigrantëve që kthehen në atdhe për një kohë të shkurtër, duke u mundësuar atyre aplikimin e shpejtë për dokumente biometrike.

/rtsh.al/