Prokuroria e Tiranës ndërmori një aksion që prej mbrëmjes së të hënës, duke ndërhyrë në tri mjedise call cnterash.

Ndonëse organi i akuzës nuk ka folur zyrtarisht, të dhënat bëjnë me dije se janë lëshuar 7 urdhër-arreste dhe 2 ndalim dalje jashtë vendit.

Tre prej 7 masave të sigurisë arrest me burg janë ekzekutuar, Eduart Dalla, Mateo Hoxha dhe Tedi Agastra, ku dyshohet se dy të fundit konvertonin shumat e përfituara në kriptomonedha për të fshehur gjurmët e parave.

Në tri Call Center-at, 2 prej të cilëve ndodheshin në zonën pranë Kopshtit Zoologjik, ndërsa njëri prej tyre në Rrugën e Kavajës, janë gjetur në zyra mbi 80 operatorë, të cilët janë shoqëruar dhe janë marrë në pyetje.

Gjatë kontrolleve, bëhet me dije se agjentët e policisë kanë sekuestruar mbi 900 mijë euro cash, si dhe një sasi të konsiderueshme pajisjesh, përfshirë kompjuterë, USB, servera dhe kamera sigurie.

Call centerat mashtronin shtetas të huaj me qëllim zhvatjen e shumave të mëdha të parave, ku ndaj të gjithë personave, përfshirë administratorë, punonjës IT, mirëmbajtës interneti, financierë etj., rëndon akuza për veprën penale ‘Mashtrim kompjuterik’, pasi ka dyshime se ata kanë mashtruar mijëra qytetarë evropianë, ku dëmi ekonomik i shkaktuar nga ky aktivitet dyshohet të kalojë shifrën e 50 milionë eurove.

Të përfshirë në operacion ishin edhe autoritetet gjermane e austriake ndërsa hetimet bëhet me dije se kishin nisur 2 vite më parë.

/rtsh.al/