Në një interpelancë të kërkuar nga deputeti Klevis Balliu, Ministri i Punëve të Brendshme, Besfort Lamallari, trajtoi ngjarjen e rëndë ku gjatë një operacioni policor humbi jetën efektivi i Policisë së Shtetit, Dëshmori i Atdheut Enea Mekolli, dhe mbeti i plagosur kolegu i tij, Edison Adri. 

Ministri Lamallari bëri të ditur se për zbardhjen e plotë të rrethanave të ngjarjes kanë nisur hetime administrative dhe institucionale nga Drejtoria e Përgjithshme e Policisë dhe Agjencia e Mbikëqyrjes Policore (AMP).

Ai theksoi se: “Përgjegjësia do të trajtohet ekskluzivisht mbi bazën e fakteve dhe përfundimeve të hetimit, pa ndikime politike. Deri në përfundim të këtij procesi, çdo koment është i papërshtatshëm duke pasur parasysh funksionin e Ministrit të Punëve të Brendshme.  Të dhënat do të ndahen me transparencë të plotë sapo të ketë një përfundim të hetimeve që zhvillohen dita-ditës. Mbështetja për familjet e efektivëve”.

Gjatë fjalës së tij, ministri Lamallari shprehu ngushëllimet për familjen e të ndjerit dhe konfirmoi masat mbështetëse për familjarët e dy efektivëve: 

“Ministria i ka dorëzuar familjes së Enea Mekollit certifikatën e statusit “Dëshmor i Atdheut”. Është akorduar një ndihmë financiare për familjet e Enea Mekollit dhe Edison Adrit. Është iniciuar procedura për mbështetjen financiare të fëmijës së mitur të Dëshmorit të Atdheut, bazuar në ligjin për fëmijët në mbrojtje të Republikës.”

Ministri e mbylli fjalën e tij duke nderuar kujtimin dhe veprën e Enea Mekollit dhe të 232 martirëve të tjerë të Policisë së Shtetit.

/rtsh.al/