Guvernatori i Bankës së Shqipërisë, Gent Sejko, ka pritur sot në një takim zyrtar një delegacion të Bankës Evropiane për Rindërtim dhe Zhvillim (BERZH), të kryesuar nga Përfaqësuesi i ri Rezident i këtij institucioni në Shqipëri, Hannes Takacs. Delegacioni shoqërohej gjithashtu nga Ekaterina Solovova dhe përfaqësues të tjerë të të dy strukturave financiare.

Gjatë takimit, Guvernatori Sejko bëri një ekspoze të zhvillimeve më të fundit ekonomike, duke theksuar se sipas projeksioneve zyrtare, ekonomia shqiptare pritet të ruajë ritme solide rritjeje edhe në vijim, falë një politike monetare të kujdesshme dhe konsistente.

Sistemi bankar në stabilitet dhe treguesit historikë të kredisë

Një hapësirë e veçantë gjatë bisedimeve iu dedikua analizës së sektorit bankar në vend. Sejko nënvizoi se sistemi mbetet i qëndrueshëm, duke evidentuar progresin e treguesve të kapitalizimit, likuiditetit dhe përfitueshmërisë.

Niveli i kredive me probleme ka zbritur në 3.7%, shifër që përfaqëson pikën më të ulët historike që nga viti 2008.

Sipas Guvernatorit, ky rezultat ka ardhur si pasojë e reformave strukturore të dekadës së fundit, përmirësimit të disiplinës financiare dhe efektivitetit të kuadrit mbikëqyrës.

Katër kolonat e bashkëpunimit strategjik dhe programet për BE-në

Sejko vlerësoi asistencën teknike të BERZH-it, duke veçuar disa projekte kyçe që ndikojnë në modernizimin e tregut dhe përafrimin e standardeve: Përgatitja e infrastrukturës rregullative për administrimin e rreziqeve nga ndryshimet klimatike; asistenca për zhvillimin e tregut të parasë sipas standardeve ndërkombëtare; vetëvlerësimi i kuadrit rregullator dhe mbikëqyrës të Bankës së Shqipërisë në raport me standardet e Bashkimit Evropian; zbatimi i iniciativës WE Finance Code, e cila synon të lehtësojë aksesin në financim për gratë sipërmarrëse dhe ndërmarrjet mikro, të vogla dhe të mesme (NMVM).

BERZH riafirmon mbështetjen për tranzicionin e gjelbër dhe digjitalizimin

Nga ana e tyre, përfaqësuesit e BERZH-it konfirmuan gatishmërinë për të zgjeruar bashkëpunimin dypalësh në fusha të reja me interes reciprok.

“BERZH-i do të vijojë të jetë një partner strategjik për Shqipërinë, duke mbështetur zhvillimin e sektorëve kyç të ekonomisë, me fokus në forcimin e konkurrueshmërisë së bizneseve shqiptare, tranzicionin drejt ekonomisë së gjelbër, përshpejtimin e digjitalizimit dhe mbështetjen e sipërmarrjes, veçanërisht të ndërmarrjeve të vogla dhe të mesme”, deklaroi në përfundim të takimit Përfaqësuesi i ri Rezident, Hannes Takacs.

/rtsh.al/