Data 23 korrik ka hyrë zyrtarisht në histori si dita më e ngarkuar për aviacionin komercial në mbarë botën. Platforma e monitorimit Flightradar24 regjistroi gjithsej 153.359 fluturime brenda një periudhe 24-orëshe. Ekspertët e lidhin këtë shifër rekord me kulmin e sezonit turistik në hemisferën veriore, kur miliona njerëz udhëtojnë për pushimet verore.

Për të përballuar kërkesën e lartë, kompanitë ajrore kanë shtuar ndjeshëm numrin e fluturimeve në shumë linja ndërkombëtare. Rritja e trafikut ajror ka vënë nën presion edhe aeroportet më të mëdha, të cilat po përballen me fluks rekord pasagjerësh dhe lëvizjesh.

Sipas specialistëve, këto shifra tregojnë se industria e aviacionit po vazhdon të rimëkëmbet me ritme të shpejta pas goditjes që pësoi gjatë pandemisë. Kërkesa për udhëtime ajrore vijon të rritet, duke nxitur zgjerimin e kapaciteteve të kompanive dhe aeroporteve. Muajt e verës mbeten periudha më intensive për transportin ajror në shkallë globale.

Për pasagjerët, kjo do të thotë aeroporte më të mbushura dhe pritje më të gjata gjatë udhëtimeve. Rekordi i ri konfirmon se udhëtimet ajrore vazhdojnë të jenë zgjedhja kryesore për miliona njerëz në sezonin e pushimeve.

/rtsh.al/