Përmes një njoftimi Zyrtar për shtyp, Drejtoria e Përgjithshme e Burgjeve (DPB) ka sqaruar rrethanat ligjore dhe administrative të transferimit të kryetarit të Bashkisë së Tiranës, Erion Veliaj, nga institucioni i paraburgimit në Durrës drejt atij në Fier. Institucioni pranoi se mori vendim për të bërë këtë njoftim “të pazakontë për shtyp lidhur me procedura standarde të brendshme të punës”, nisur nga ajo që e cilëson si spekulim të shumtë mediatik.

Sipas DPB-së, zhvendosja e shtetasit E. V. është kryer në kuadër të masave të ndërmarra së fundmi për të garantuar sigurinë dhe mbarëvajtjen e institucioneve të ekzekutimit të vendimeve penale.

Procedurat e pranimit dhe takimi me komisionin në IEVP Fier

Në deklaratë bëhet me dije se pas mbërritjes në IEVP Fier, ndaj të paraburgosurit janë zbatuar hapat e parashikuar nga ligji nr. 81/2020 “Për të drejtat dhe trajtimin e të dënuarve me burgim dhe të paraburgosurve” dhe Rregullorja e Përgjithshme e Burgjeve.

Më datë 28 tetor 2026, i paraburgosuri është vendosur në seksionin e pranimit (observimit), ku sipas njoftimit “u trajtua korrektësisht dhe në përputhje me kuadrin ligjor si për të gjitha rastet e tjera”.

Një ditë më pas, më 29 tetor, strukturat përgjegjëse të IEVP Fier kanë zhvilluar një takim me të në ambientet e observimit. Gjatë këtij komunikimi “janë dëgjuar pretendimet e tij dhe janë dhënë sqarime mbi të drejtat dhe detyrimet mbi qëndrimin në institucion”, ndërsa komisioni i pranimit ka vijuar me sistemimin e tij të plotë bazuar në vlerësimin individual.

Klasifikimi i urdhrit dhe kuadri ligjor i transferimeve

Lidhur me urdhrin e transferimit — pikë e cila ka nxitur diskutime në publik — Drejtoria e Përgjithshme e Burgjeve sqaron se dokumenti është miratuar sipas rregullave dhe hyn në kategorinë e dokumenteve të klasifikuara “sekret shtetëror”.

Për këtë arsye, “administrimi, njohja dhe vënia në dispozicion e tij u nënshtrohen kushteve, kritereve dhe procedurave të parashikuara në ligjin nr. 10/2023 ‘Për informacionin e klasifikuar’”.

DPB shton se për këtë lëvizje është vënë në dijeni edhe organi i prokurorisë, siç e përcakton legjislacioni në fuqi.

Sa i përket diskrecionit administrativ, institucioni nënvizoi se nxjerrja e urdhrit për çdo arsye të përligjur është kompetencë e Drejtorit të Përgjithshëm të Burgjeve, si pjesë e praktikës normale të punës. Për të ilustruar se bëhet fjalë për dinamikë të zakontë pune, DPB bëri me dije se “prej datës 16.10.2026 deri më datë 27.10.2026 janë kryer 24 transferime brenda kuadrit ligjor”.

Në përmbyllje të njoftimit, Drejtoria e Përgjithshme e Burgjeve nënvizon se do të vijojë të marrë të gjitha masat e nevojshme për garantimin e sigurisë dhe parandalimin e ngjarjeve në institucione, duke respektuar të drejtat dhe dinjitetin e personave të privuar nga liria.

/rtsh.al/