Gjykata e Lartë në Itali ka miratuar ekstradimin drejt Gjermanisë të një shtetasi ukrainas të dyshuar për sabotimin e gazsjellësit “Nord Stream”, ka konfirmuar avokati i tij Nicola Canestrini. I dyshuari, i njohur si Serhii K., ishte arrestuar në Rimini në gusht dhe prej muajsh kundërshtonte dorëzimin te autoritetet gjermane.

Vendimi i gjykatës në Romë hap rrugën që ai të transferohet brenda pak ditësh. Avokati tha se “zhgënjimi është i madh, por besoj në një gjykim të drejtë dhe në lirimin e tij në Gjermani”. Shpërthimet në Detin Baltik, të cilat Rusia dhe vendet perëndimore i kanë cilësuar si sabotim, dëmtuan rëndë gazsjellësin dhe shkaktuan ulje të dërgesave të gazit rus drejt Evropës.

Serhii K., një ish-oficer i ushtrisë ukrainase, mohon çdo përfshirje në këto ngjarje. Megjithatë, prokurorët gjermanë dyshojnë se ai ka qenë pjesë e një grupi që vendosi pajisje shpërthyese pranë ishullit danez Bornholm.

Hetuesit thonë se operacioni kishte për qëllim dëmtimin e strukturave strategjike energjetike. Ai akuzohet për bashkëpunim në shpërthim dhe sabotim të infrastrukturës. Dosja përfshin edhe dyshime për shkatërrim të qëllimshëm të një objekti me rëndësi të lartë.

Autoritetet gjermane presin që ekstradimi të ndodhë pa vonesa. Rasti ka marrë vëmendje të gjerë për shkak të ndikimit të tij në sigurinë energjetike evropiane. Ndërkohë, avokati këmbëngul se klienti i tij nuk ka lidhje me këtë çështje.

Gazetar: A. Mata

/rtsh.al/