Pas suksesit në teatrin Bylis të Fierit, komedia “Ëndërr në papafingo” me regji dhe skenar të Leka Bungos pritet të ngjitet në skenën e Elbasanit.

Me një kastë të zgjedhur aktorësh, bashkëpunim mes teatrit “Bylis” dhe “Skampa”, “Ëndërr në papafingo” përmes satirës përcjell drama të kaluara në vitet ’70 dhe trajton temën e ndërtimit të familjes së re socialiste.

“Komedia ka të bëjë me korrupsionin moral, që është i gjallë edhe sot në Shqipëri. Ky është mesazhi kryesor i komedisë, duke e zbuluar para brezit të ri që nuk e ka njohur atë periudhë, por edhe për brezin tonë krijon emocione, sepse janë ato ndodhi, ato ngjarje dhe ajo psikologji e asaj periudhe, e cila duhet rikujtuar për të mos u kthyer më,” u shpreh z. Bungo.

Me subjekt të thjeshtë ku e shkuara i flet të ardhmes , komedia “Ëndërr në papafingo” do të ngjitet në skenën e teatrit “Skampa” në datat 16–17–18 janar, ora 18:00.

“Unë shpresoj që edhe në qytetin e Elbasanit, spektatori ta mirëpresë ashtu sikundër është mirëpritur në qytetin e Fierit,” tha regjisori dhe skenaristi, z. Bungo.

“Ëndërr në papafingo” ishte komedia që ngriti siparin e festivalit teatror të organizuar në Preshevë më 9 dhjetor, ku mori çmimin special të festivalit.

/rtsh.al/