Irani ka ndaluar cisternat me naftë në Ngushticën e Hormuzit pas sulmeve izraelite në Liban.

Ashtu siç raportojnë agjencitë e lajmeve iraniane bëhet e ditur se lëvizjet e cisternave u ndalën paralelisht me sulmet izraelite, pa dhënë detaje të mëtejshme operative.

Më herët gjatë ditës, pas pranimit nga Presidenti amerikan Donald Trump të kushteve iraniane dhe vendosjes së një armëpushimi, dy cisterna me naftë u lejuan të kalojnë në mënyrë të sigurt përmes kësaj rruge strategjike.

Nga ana tjetër, ushtria izraelite njoftoi se të mërkurën goditi më shumë se 100 vende brenda “10 minutave” në disa zona të Bejrutit, Luginës së Bekasë dhe Libanit jugor.

Ky ishte sulmi më i madh i koordinuar që nga fillimi i ofensivës aktuale, i përqendruar kryesisht në objektiva të Hezbollahut. Sulmet shkaktuan dhjetëra të vdekur dhe qindra të plagosur, sipas autoriteteve libaneze, dhe panik në rrugë. Izraeli theksoi se armëpushimi me Iranin nuk vlen për operacionin kundër Hezbollahut në Liban.

Trump të martën shpalli një armëpushim dyjavor me Iranin, duke thënë se Teherani paraqiti një propozim 10-pikësh për negociata.

Ky njoftim erdhi pak më pak se dy orë para skadimit të një afati që Trump e kishte zgjatur disa herë, ku kërkohej nga Irani të rihapte Ngushticën e Hormuzit ose do të përballej me “shkatërrimin e një civilizimi të tërë”.

Armëpushimi u ndërmjetësua pjesërisht nga Pakistani dhe parashikon hapje të përkohshme të ngushticës për trafikun detar.

Ngushtica e Hormuzit është jashtëzakonisht e rëndësishme sepse përmes saj kalon rreth 20% e naftës dhe gazit natyror të lëngshëm të botës.

Që nga fillimi i konfliktit, shkurt-mars 2026, Irani e kishte kufizuar ose ndaluar pjesërisht trafikun si përgjigje ndaj sulmeve amerikano-izraelite, duke shkaktuar rritje të çmimeve globale të energjisë dhe bllokim anijesh.

Pas armëpushimit, lëvizjet mbeten të ulëta dhe të pasigurta, me vetëm disa anije që kanë kaluar deri tani.

Irani ka paralajmëruar se mund të tërhiqet nga armëpushimi nëse Izraeli vazhdon sulmet në Liban.

Tregjet financiare reaguan pozitivisht fillimisht ndaj lajmit të armëpushimit, ku ranë edhe çmimet e naftës, por tensionet e reja në Liban mund të ndikojnë sërish.

/rtsh.al/