Mjekësia shqiptare është në zi pas ndarjes nga jeta të Dr. Edi Tushe, neonatologut, pedagogut dhe mentorit që dha një kontribut të jashtëzakonshëm në zhvillimin e kujdesit për të porsalindurit në Shqipëri.

Dr. Tushe konsiderohej një nga pionierët e neonatologjisë moderne shqiptare. Gjatë karrierës së tij shumëvjeçare, ai luajti një rol të rëndësishëm në ngritjen dhe zhvillimin e shërbimeve neonatologjike, duke ndihmuar në përmirësimin e kujdesit shëndetësor për mijëra foshnja dhe familje shqiptare.

Përveç kontributit në praktikën mjekësore, ai ishte një pedagog dhe mentor i respektuar, duke ndikuar drejtpërdrejt në formimin profesional të brezave të tërë mjekësh. Përkushtimi ndaj profesionit, dija e thellë dhe vizioni i tij për avancimin e mjekësisë e bënë një nga personalitetet më të vlerësuara në fushën e shëndetësisë.

Në një mesazh ngushëllimi, Ministria e Shëndetësisë dhe Mirëqenies Sociale vlerësoi figurën dhe veprën e Dr. Tushes, duke theksuar se sistemi shëndetësor humbi një prej njerëzve që me punën dhe kontributin e tij la gjurmë të pashlyeshme në historinë e mjekësisë shqiptare.

Familjarë, miq, kolegë dhe ish-studentë kanë shprehur dhimbjen për humbjen e tij, duke e kujtuar si një profesionist të përkushtuar dhe një njeri me vlera të larta njerëzore.

/rtsh.al/