“Sot jemi rivalë, por gjithmonë miq! Kafeja dhe çaji janë falas për të gjithë tifozët turq. Ju paguat në vitin 1999, sot nuk do të paguani asgjë”, – shkruhej në tabelën para një restoranti në Prishtinë, para ndeshjes Kosovë-Turqi për Play-off-in e Botërorit. Menjëherë ajo tabelë bëri xhiron e botës.

Pronari i restorantit në fjalë quhet Mentor Berisha dhe së fundi ai dhe familja e tij kanë vizituar Stambollin me ftesë të presidentit të Federatës Turke të Futbollit, İbrahim Ethem Hacıosmanoğlu.

Në fund të takimit, që u zhvillua në kampin stërvitor të ekipave kombëtare të Turqisë, familja Berisha i dhuroi presidentit të federatës turke tabelën që kishte vendosur në restorantin e saj. Presidenti Hacıosmanoğlu në anën tjetër i dhuroi familjes Berisha fanella të Turqisë me emrat e çdo pjesëtari.

Mentor Berisha tërhoqi vëmendjen dhe mori vlerësime nga qytetarët turq për tabelën që kishte varur në hyrje të restorantit të tij në Prishtinë më 31 mars, kur Kosova u mund 0-1 nga Turqia dhe nuk mundit të shkojë në Botëror.