Publikimi i pamjeve të para nga fshati Gojan i Madh në Bashkinë e Pukës ka zbuluar përmasat e vërteta të dëmeve të shkaktuara nga zjarri masiv që përfshiu zonën. Në pamjet e siguruara nga terreni duken qartë muret e shkrumbuara dhe çatitë e shembura të objekteve në lagjen Pepaj, ku flakët depërtuan me shpejtësi drejt zonave të banuara për shkak të erërave të forta dhe terrenit të thyer pyjor.

Kjo vatër zgjoi alarm gjatë orëve të shkuara, duke detyruar strukturat e emergjencës të nisnin evakuimin e menjëhershëm të familjeve të rrezikuara.

Bilanci i dëmeve dhe operacioni i shpëtimit

Sipas të dhënave zyrtare të përditësuara nga Prefektura e Qarkut Shkodër dhe Ministria e Mbrojtjes, situata në terren po shkon drejt përmirësimit pas një operacioni masiv toka-ajër. Bilanci i dëmeve konfirmon djegien e 3 banesave të braktisura, ndërsa ndërhyrja e shpejtë e forcave të mbrojtjes civile bëri të mundur shpëtimin e 2 banesave të banuara që ndodheshin në rrezik të drejtpërdrejtë.

Për zbutjen e kësaj emergjence u mobilizua një rrjet i gjerë forcash dhe mjetesh nga disa rajone të vendit:

• Forcat në terren: 255 persona, përfshirë 50 efektivë të MZSH-së (nga Puka, Fushë-Arrëzi, Kamza, Kukësi, Hasi dhe Shkodra), 53 efektivë të Forcave të Armatosura, 14 punonjës të Shërbimit Pyjor, 68 punonjës të shërbimeve vendore dhe 70 vullnetarë e banorë lokalë.
• Logjistika: 11 mjete zjarrfikëse (5 prej të cilave të dislokuara drejtpërdrejt në perimetrin e banesave) dhe mbështetje e pandërprerë nga ajri përmes 1 helikopteri të Forcave Ajrore.

“Forcat mbeten të angazhuara në terren, me prioritet mbrojtjen e jetës së banorëve, banesave dhe parandalimin e riaktivizimit të vatrave,” njoftoi zyrtarisht Prefektura e Qarkut Shkodër.

Edhe ministri i Mbrojtjes, Ermal Nufi, konfirmoi se pavarësisht terrenit të thyer që pengonte lëvizjen e mjeteve motorike, ndërhyrja nga ajri shmangu përkeqësimin e mëtejshëm të situatës, si dhe humbjes së jetëve të njerëzve. Ministri bëri me dije se forcat ushtarake dhe zjarrfikësit do të vijojnë qëndrimin në gatishmëri përgjatë gjithë natës për të monitoruar situatën dhe për të shmangur riaktivizimin e zjarrit.

/rtsh.al/