76 persona kanë humbur jetën nga zjarri që shpërtheu në një rezort për ski në Kartallkaja.

Një numër i madh ekipesh ndërhynë për të shuar zjarrin, që shpërtheu për arsye ende të panjohura. Flakët u përhapën ditën e martë rreth orës 3:30 të mëngjesit në hotelin 12-katësh “Grand Kartal”, rreth 170 kilometra në veriperëndim të kryeqytetit Ankara. Besohet se zjarri nisi në restorantin e hotelit dhe u shtri me shpejtësi.

Në momentin e ngjarjes në hotel ishin të regjistruar rreth 238 klientë.

Dëshmitarët thonë se ata që ndodheshin në hotel u përpoqën t’u shpëtonin flakëve duke zbritur nga dritaret me litarë apo çarçafë. 

Puna në hotelin 12-katësh, ku zjarrfikësit arritën duke përdorur mjete me shkallë dhe shporta, u përqendrua në katet e sipërme. Disa pushues u panë duke lidhur çarçafë dhe duke i varur ato nga dritaret në përpjekje për të shpëtuar gjatë zjarrit. Disa nga viktimat humbën jetën për shkak se u hodhën nga lartësia.

Nga ana tjetër, disa të ftuar dhe punonjës që janë evakuuar nga hoteli po akomodohen në një tjetër hotel pranë hotelit ku ka rënë zjarri dhe po i nënshtrohen kontrolleve shëndetësore.

Në rajon mbërritën edhe ministri i Brendshëm Ali Yerlikaya, Ministri i Shëndetësisë Kemal Memişoglu, Ministri i Kulturës dhe Turizmit Mehmet Nuri Ersoy dhe presidenti i AFAD-it Okay Memiş.

Ministrat Yerlikaya, Memişoğlu, Ersoy dhe Presidenti i AFAD-it Memiş zhvilluan një takim lidhur me zhvillimet në një hotel në rajon me guvernatorin e Bolu, Abdulaziz Aydın, kryebashkiakun e Bolu Tanju Özcan dhe krerët e njësive përkatëse.  Në vendngjarje ka dalë edhe ministri i Industrisë dhe Teknologjisë Mehmet Fatih Kacır, i cili ka marrë informacion nga autoritetet dhe ka bërë ekzaminime.

Ministri Yerlikaya, në deklaratën e tij për shtyp pas takimit, raportoi se numri i personave që humbën jetën nga zjarri është rritur në 66 dhe numri i të plagosurve është rritur në 51.

Ministri i Shëndetësisë Memişoğlu njoftoi se një nga 51 personat e plagosur nga zjarri po merrte trajtim në terapi intensive dhe 17 persona u liruan.

Rezorti i Kartallkajasë është një destinacion i njohur për pushuesit në dimër, sidomos gjatë pushimeve dimërore të shkollës, që fillojnë nga data një janar deri në javën e parë të shkurtit.

/rtsh.al/