Tensione të larta dhe mobilizim masiv policor në veri të vendit. Prej orëve të para të mëngjesit të sotëm, fshati Orosh në Fushë Arrëz është kthyer në skenën e një operacioni të rrezikshëm, ku forcat speciale RENEA dhe policia e Pukës kanë rrethuar një banesë.

Brenda shtëpisë dyshohet se janë ngujuar dy persona të shumëkërkuar, të cilët refuzojnë të dorëzohen.

Kush janë të dyshuarit?

Sipas raportimeve nga RTSH 24, njëri prej personave të rrethuar është identifikuar si J. C. Mbi të rëndojnë dyshime të forta, pasi autoritetet e lidhin atë me aktivitete të grupeve terroriste, çka ka rritur shkallën e alarmit.

Bashkë me të ndodhet edhe një person i dytë, i cili raportohet se është nga Tirana, por identiteti i tij ende nuk bëhet i ditur.

Të dyshuarit fillimisht u pikasën nga efektivat e policisë së Pukës, të cilët duke vlerësuar rrezikshmërinë e lartë, kërkuan ndërhyrjen e menjëhershme të forcave elitë RENEA.

“Prej disa orësh policia po u bën thirrje që të dorëzohen, por ata nuk kanë pranuar,” raporton gazetari në vendngjarje.

Operacioni konsiderohet tejet delikat dhe ndërhyrja fizike në banesë po shtyhet për momentin, pasi ka informacione të sigurta se dy personat janë të armatosur rëndë. Policia po mban perimetrin e sigurisë dhe po e ngushton atë, duke tentuar të shmangë përplasjen me armë, ndërkohë që zona mbetet e izoluar deri në një urdhër të dytë.

/rtsh.al/