Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka njoftuar miratimin e Rregullores së re të Brendshme “Për sigurinë, rendin, solemnitetin dhe rregullat e sjelljes”, e cila synon vendosjen e standardeve bashkëkohore për administrimin e veprimtarisë gjyqësore. Dokumenti, i miratuar me vendimin nr. 49 më 17 korrik 2026, do të hyjë zyrtarisht në fuqi më 1 shtator 2026 dhe sjell ndryshime rregullatore sa i përket kontrollit të hyrjes, përdorimit të pajisjeve elektronike dhe mbulimit mediatik.

Siguria dhe aksesi, procedura të barabarta për të gjithë

Rregullorja e re përcakton një kuadër të integruar masash organizative, teknike dhe procedurale për kontrollin e hyrjes dhe identifikimin e personave në ambientet e gjykatës. Sipas njoftimit institucional, këto masa kanë primarisht karakter parandalues për shmangien e incidenteve dhe mbrojtjen e pjesëmarrësve në proceset e ndjeshme penale.

“Në një shtet të së drejtës, siguria e gjykatës nuk përbën një qëllim në vetvete dhe as nuk duhet të perceptohet si një kufizim i transparencës apo i të drejtave të individit. Përkundrazi, ajo është një garanci që drejtësia të administrohet në kushte të sigurta, të qeta dhe dinjitoze”, thuhet në njoftimin zyrtar të GJKKO-së.

Ndalohen telefonat celularë në sallat e gjykimit

Në kuadër të ruajtjes së integritetit të procesit dhe mbrojtjes së të drejtave të pjesëmarrësve, rregullorja përcakton se në sallat e gjykimit nuk do të lejohet mbajtja apo përdorimi i telefonave celularë dhe pajisjeve të tjera elektronike.

Përjashtim nga ky rregull do të bëjnë vetëm rastet e kufizuara kur përdorimi i pajisjeve lidhet drejtpërdrejt me ushtrimin e funksioneve procedurale ose detyrave institucionale. Gjykata thekson se këto kufizime do të zbatohen pa përjashtim për të gjithë personat e pranishëm, pavarësisht funksionit apo statusit.

Rregulla të reja për median dhe transmetimet audio-video

GJKKO nënthekson se publiciteti i gjykimit mbetet një garanci thelbësore e procesit të rregullt ligjor, por bën një ndarje konseptuale mes të drejtës për të ndjekur seancën dhe të drejtës për ta regjistruar apo transmetuar atë. Çdo autorizim për regjistrim audio-video ose fotografim do të vlerësohet rast pas rasti nga gjykata. Ndërkohë, filmimi dhe fotografimi në hollet dhe ambientet e brendshme të gjykatës ndalohen.

“E drejta për të ndjekur një seancë gjyqësore publike nuk është e njëjtë me të drejtën për ta regjistruar, fotografuar apo transmetuar atë. Rregullat e parashikuara nuk synojnë të kufizojnë veprimtarinë e medias, por të krijojnë procedura të qarta, transparente dhe të njëjta për të gjithë.”, theksohet në njoftimin e GJKKO-së.

Për më tepër, aksesi i gazetarëve në sallat e gjykimit do të administrohet përmes një sistemi akreditimi të mbështetur në kritere objektive, si kapaciteti i sallës dhe kërkesat e sigurisë, duke shmangur vlerësimet mbi përmbajtjen apo linjën editoriale.

Kodi i sjelljes, veshjes dhe hyrja në fuqi

Dokumenti normativ përcakton gjithashtu standarde mbi veshjen, etikën e komunikimit dhe ruajtjen e solemnitetit në mjediset e gjykatës. Me hyrjen në fuqi të rregullores më 1 shtator 2026, gjykata do të ndërmarrë rishikimin e të gjitha autorizimeve ekzistuese të hyrjes dhe lejeve të aksesit. Rregullorja e plotë së bashku me Komentarin sqarues janë publikuar tashmë në rubrikën “Multimedia” në faqen zyrtare të gjykatës.

/rtsh.al/