Sekretari i Përgjithshëm i NATO-s Mark Rutte pritet të vizitojë Turqinë këtë të hënë për të zhvilluar bisedime me zyrtarë të lartë turq, përfshirë presidentin Recep Tayyip Erdogan , në udhëtimin e tij të parë zyrtar në Ankara pas marrjes së detyrës më 1 tetor.

Një deklaratë e lëshuar nga NATO informon se Rutte do të takohet me Erdoganin si dhe me ministrin e Jashtëm Hakan Fidan dhe ministrin e Mbrojtjes Yaşar Güler. Bisedimet priten të fokusohen në pritshmëritë e Turqisë nga aleatët e NATO-s, veçanërisht në kuadër të luftës kundër terrorizmit. Ankaraja kërkon më shumë mbështetje dhe solidaritet kundër terrorizmit, i cili është përcaktuar si një nga dy kërcënimet kryesore kundër aleancës.

Rutte dhe zyrtarët turq do të vlerësojnë gjithashtu përpjekjet për rritjen e partneritetit midis NATO-s dhe Bashkimit Evropian. Udhëheqësit do të shqyrtojnë zhvillimet e fundit në okupimin rus të Ukrainës dhe masakrat e vazhdueshme izraelite në Gaza.

Ata gjithashtu do të shkëmbejnë mendime rreth ndikimeve të rizgjedhjes së Donald Trump si President i SHBA-së në konfliktet globale. Pas Ankarasë, Rutte do të shkojë në Athinë për të takuar liderët grekë.

/RTSH/