Senati konfirmoi Marco Rubio si Sekretarin e Shtetit të Presidentit Donald Trump. Rubio është zyrtari i parë i kabinetit të nivelit të lartë për administratën e re Trump që u miratua me votimin e Senatit.

Votimi u zhvillua vetëm disa orë pasi Trump u betua si president, ku Rubio mori 99 vota pro në Senatin dypartiak, ndërsa asnjë senator nuk votoi kundër nominimit.

Gjatë fjalës së tij, Rubio shprehu mbështetjen e tij për NATO-n dhe shtoi se SHBA nuk mund të tërhiqet nga aleanca pa miratimin e Senatit ose një akt të Kongresit.

Rubio foli gjithashtu për nevojën që SHBA të mbajë një qëndrim të fortë në lidhje me Kinën gjatë seancës së konfirmimit të tij, duke e quajtur Partinë Komuniste Kineze një kundërshtar “të fuqishëm” dhe “të rrezikshëm”.

“Ata janë një kundërshtar dhe konkurrent teknologjik, një konkurrent industrial, një konkurrent ekonomik, një konkurrent gjeopolitik, një konkurrent shkencor tani, në çdo fushë, është një sfidë e jashtëzakonshme dhe që unë besoj se do të përcaktojë shekullin e 21-të. Pjesa më e madhe e asaj që duhet të bëjmë për t’u përballur me Kinën është këtu në shtëpi. Nuk është vetëm jashtë vendit, është edhe këtu në shtëpi. Ne duhet të rindërtojmë kapacitetin tonë industrial vendas dhe duhet të sigurohemi që Shtetet e Bashkuara të mos varen nga asnjë komb tjetër për ndonjë nga zinxhirët tanë kritikë të furnizimit,” tha Rubio.

Lidhur me luftën e Rusisë kundër Ukrainës, Rubio tha se është “joreale të besohet se Ukraina mund t’i shtyjë forcat ruse atje ku ishin para pushtimit të vitit 2022”, ndërsa shtoi se lufta duhet të përfundojë.

Rubio ka shërbyer si senator republikan i Floridës që nga viti 2011 dhe emërimi i tij tërhoqi mbështetje të fortë nga një numër demokratësh të Senatit, të cilët e quajtën kolegun e tyre shumë të kualifikuar për këtë rol.

/rtsh.al/