Pasi Brazili raportoi të premten e shkuar rastin e parë të shpërthimit të gripit të shpendëve në një fermë në jug të tij, autoritete e Kosovës kanë vendosur që të ndalojnë importet e mishit të pulës dhe produkteve të tjera të shpendëve nga vendi i Amerikës Jugore.

Në një njoftim për shtyp, Agjencia e Ushqimit dhe Veterinarisë e Kosovës bëri me dije se vendimi për ndalimin e këtyre importeve hyn në fuqi duke filluar nga kjo e martë deri në një njoftim të dytë.  

“Ky vendim synon të mbrojë shëndetin publik dhe të parandalojë përhapjen e mundshme të sëmundjes në territorin e Kosovës,” shkruhet në njoftimin e Agjencisë së Ushqimit, ku gjithashtu theksohet se pavarësisht që gripi i shpendëve është një sëmundje shumë ngjitëse, që në raste të rralla mund të transmetohet tek njeriu, nuk ka prova që konsumi i mishit apo vezëve mund të shkaktojë infeksion.

Megjithatë sipas kësaj agjencie, ndalimi i importeve nga Brazili ishte masë paraprake për të garantuar sigurinë ushqimore të qytetarëve.

Kosova nuk është i vetmi vend që merr një masë të tillë. Edhe vendet e Bashkimit Europian, Kina, Japonia, Emirate e Bashkuara Arabe kanë ndaluar importet e mishit të shpendëve dhe vezëve nga Brazili, i cili është eksportuesi më i madh në botë i mishit të pulës. 

Gazetare: Elda Pepa

/rtsh.al/