Këshilli i Ministrave ka miratuar një vendim të ri të hollësishëm që rregullon vendosjen e tabelave, simboleve dhe organizimin e korsive të lëvizjes në të gjitha pikat e kalimit kufitar dhe zonat e verifikimit në vend. Vendimi është marrë me propozimin e Ministrit të Punëve të Brendshme, dhe mbështetet në ligjin e ri nr. 39/2025 “Për kontrollin e kufirit shtetëror”.

Ky vendim sjell një shfuqizim të kuadrit të vjetër rregullator të vitit 2016, duke synuar përafrimin e sinjalistikës kufitare me standardet ndërkombëtare dhe menaxhimin më efikas të flukseve të udhëtarëve dhe mjeteve.

Sinjalistika dygjuhëshe dhe shënimi i zonave kufitare

Sipas rregullave të reja, çdo zonë verifikimi, pikë kalimi dhe zonë tranziti do të pajiset me tabela orientuese të unifikuara në dy gjuhë: shqip dhe anglisht. Vendimi specifikon pikat e sakta të vendosjes së tyre:

“Zona e verifikimit kufitar shënohet me tabela në gjuhët shqip dhe anglisht. a) në çdo hyrje të territorit të portit dhe aeroportit, që është pikë e kalimit kufitar; b) në rastin e pikave tokësore të kalimit kufitar, në të gjitha rrugët automobilistike që çojnë në pikën përkatëse të kalimit kufitar, në vendin që korrespondon me fillimin e zonës së verifikimit kufitar”, thuhet në vendim.   

Për pikat kufitare që nuk funksionojnë me kapacitet të plotë 24-orësh ose që kanë kufizime specifike të qarkullimit, akti parashikon detyrimin për vendosjen e tabelave ndihmëse.

“Infrastruktura e sinjalistikës parashikon se në rastin e pikave të kalimit kufitar me orar të kufizuar, nën tabelën e parashikuar vendoset një tabelë shtesë që paraqet orarin zyrtar”, sqarohet në vendim.

Gjithashtu, tabela shtesë në dy gjuhë do të vendosen në rastet kur ka kufizime specifike për persona ose kategori të caktuara mjetesh. Rregullat prekin edhe zonat e brendshme të porteve dhe aeroporteve, ku “zonat e tranzitit në aeroporte dhe porte shënohen me tabela në gjuhët shqip dhe anglisht”.

Kategorizimi i korsive të kalimit sipas statusit të udhëtarëve

Një nga pikat kryesore të vendimit është përcaktimi i korsive të veçanta të kontrollit, të cilat ndahen në tri kategori kryesore për të rritur shpejtësinë e verifikimit. Korsitë për verifikim minimal të dedikuara për personat që, sipas nenit 15 të ligjit nr. 39/2025, i nënshtrohen kësaj procedure; korsitë për të huajt pa vizë dhe me leje qëndrimi përcaktohen korsi të veçanta “për të huajt, që nuk kanë nevojë për vizë, si dhe për të huajt që posedojnë leje qëndrimi ose vizë afatgjatë të vlefshme”.; korsitë universale të përcaktuara për të gjithë personat e tjerë që nuk përfshihen në dy kategoritë e mësipërme.

Për më tepër, në pikat tokësore dhe portuale, vendimi autorizon ndarjen e korsive sipas llojit të mjetit të udhëtimit.

“Infrastruktura praktike mundëson që në pikat portuale dhe ato tokësore të kalimit të kufirit, në varësi të nevojave praktike, mund të përcaktohen korsi të veçanta për autovetura, kamionë dhe autobusë.”, theksohet në vendim.

Me hyrjen në fuqi të këtij akti, qeveria ka shfuqizuar rregulloren e mëparshme që ishte në fuqi prej një dekade.

“Vendimi nr.729, datë 20.10.2016, i Këshillit të Ministrave, ‘Për përcaktimin e tabelave dhe simboleve në pikat e kalimit kufitar dhe zonat e verifikimit kufitar’, shfuqizohet.”, nënvizohet në vendim.

Për sa i përket zbatimit të vendimit dhe kostove për sigurimin e tabelave të reja, përgjegjësitë janë ndarë midis operatorëve privatë dhe institucioneve shtetërore, në varësi të llojit të pikës kufitare:

“Ngarkohen për zbatimin e këtij vendimi: a) operatorët e aeroporteve për pikat aeroportuale dhe autoritetet portuale për pikat portuale të kalimit kufitar, për sigurimin e tabelave; b) Autoriteti Rrugor Shqiptar për sigurimin e tabelave për pikat tokësore të kalimit kufitar; c) Ministria e Financave dhe Ministria e Punëve të Brendshme, sipas përgjegjësisë së administrimit të territorit të pikës së kalimit kufitar, për sigurimin e tabelave të parashikuara në këtë vendim për pikat e kalimit kufitar tokësor.”, sqarohet në vendim.

/rtsh.al/