Fundjava me temperatura të larta ka sjellë një rritje të ndjeshme të lëvizjes së qytetarëve drejt bregdetit verior, duke krijuar trafik të rënduar në aksin Milot–Lezhë dhe në rrugën Lezhë–Shëngjin.

Që prej orëve të para të mëngjesit, segmentet kryesore të rrugës që lidhin kryeqendrën e qarkut të Lezhës me zonat bregdetare janë përballur me fluks të lartë automjetesh. Si pasojë, janë krijuar kolona të gjata dhe qarkullimi është bërë i vështirë në disa pika kyçe.

Drejtuesit e automjeteve raportojnë vonesa të konsiderueshme, ndërsa trafiku i dendur ka ndikuar në kohën e udhëtimit drejt plazheve, të cilat mbeten ndër destinacionet më të frekuentuara gjatë fundjavës.

Autoritetet dhe përdoruesit e rrugës presin që fluksi të vijojë i lartë gjatë gjithë ditës dhe në orët në vijim, për shkak të temperaturave të larta dhe numrit të madh të pushuesve që zgjedhin bregdetin e Lezhës për fundjavë.

/rtsh.al/