Një udhëzim i ri i Ministrisë së Financave, do të transformojë mënyrën se si njësitë e vetëqeverisjes vendore (NJVQV) menaxhojnë taksat dhe tarifat. Ky udhëzim përcakton formën dhe përmbajtjen e një Regjistri të Personave Fizikë e Juridikë që kanë detyrimin për të paguar taksat dhe tarifat vendore, duke përfshirë edhe të dhëna për përjashtimet apo lehtësimet fiskale. Qëllimi është të qartësojë rregullat, rolet dhe procedurat për krijimin, mbajtjen dhe përditësimin e këtij regjistri të rëndësishëm.

Ky Regjistër do të përfshijë të gjithë informacionin bazë lidhur me taksapaguesit, qofshin individë, individë të vetëpunësuar, tregtarë ambulantë, apo persona juridikë. Ai do të jetë një burim i detajuar për kategoritë e detyrimeve tatimore dhe do të pasqyrojë çdo përjashtim apo lehtësim fiskal.

Qëllimi kryesor është të rritet efikasiteti në administrimin e taksave vendore, të sigurohet një pasqyrë e qartë e detyrimeve dhe të ndihmohet në hartimin e politikave fiskale më të mira.

Regjistri elektronik dhe bashkëpunimi ndërinstitucional

Një nga risitë kryesore është kërkesa që Regjistri të krijohet dhe të mbahet në formë elektronike. Ky regjistër elektronik duhet të sigurojë përputhshmëri me standarde të larta sigurie dhe privatësie, mundësinë e kërkimit dhe filtrimit të të dhënave, mundësinë e rishikimit dhe përditësimit të të dhënave, mundësinë e përpunimit statistikor, analizës dhe raportimit të të dhënave.

Udhëzimi thekson rëndësinë e bashkëpunimit ndërinstitucional. NJVQV-të janë të ngarkuara të lidhin marrëveshje bashkëpunimi me institucione të tilla si Drejtoria e Përgjithshme e Tatimeve, Qendra Kombëtare e Biznesit, Agjencia Shtetërore e Kadastrës, OSHEE, dhe ministritë, për të siguruar shkëmbimin e informacionit të nevojshëm, gjithmonë duke ruajtur konfidencialitetin e të dhënave.

Çdo NJVQV duhet të hartojë dhe miratojë rregullore të brendshme për procedurat, strukturat përgjegjëse dhe afatet për mbledhjen, regjistrimin dhe përditësimin e informacionit për taksapaguesit. Bashkitë janë përgjegjëse për përditësimin e vazhdueshëm të Regjistrit për të reflektuar ndryshimet ligjore, demografike dhe socio-ekonomike.

Regjistri do të përfshijë detaje specifike si llojet e taksave dhe tarifave vendore, bazën e taksës, nivelin e tyre, listën e taksapaguesve (fizikë, juridikë, ambulantë), të ardhurat e planifikuara dhe të mbledhura, si dhe detyrimet e papaguara.

Raportimi dhe kundërvajtjet

NJVQV-të janë të detyruara të dërgojnë informacion statistikor në Ministrinë e Financave të paktën një herë në vit. Mosdërgimi i këtij informacioni do të konsiderohet kundërvajtje administrative dhe do të dënohet me gjobë, sipas ligjit “Për financat e vetëqeverisjes vendore”.

Ky udhëzim i ri, i firmosur nga Ministri i Financave, Petrit Malaj, pritet të sjellë një standardizim dhe modernizim të theksuar në menaxhimin e taksave vendore, duke kontribuar në një sistem fiskal më transparent dhe efikas në Shqipëri. NJVQV-të kanë një afat 4-mujor për të hartuar dhe miratuar rregulloret e tyre të brendshme.

/rtsh.al/