Fshati historik i Vajzës në bashkinë e Selenicës mirëpriti këtë fundjavë edicionin e katërt të “Vajza Fest”, një organizim i përvitshëm që tashmë është konsoliduar si një traditë e rëndësishme kulturore dhe shoqërore për zonën.

Aktiviteti bashkoi në një hapësirë të vetme elemente të traditës, artit, sportit dhe trashëgimisë lokale, duke tërhequr vëmendjen e banorëve, të rinjve, artistëve dhe vizitorëve të shumtë. Qëllimi kryesor i këtij festivali mbetet promovimi i historisë dhe zakoneve të kësaj treve, duke i përcjellë ato te brezat e rinj përmes një atmosfere festive.

I pranishëm në këtë organizim, Kryetari i Bashkisë së Selenicës, Nertil Bellaj, vlerësoi lart rëndësinë e ruajtjes dhe promovimit të vlerave autoktone të zonës.

“Ky aktivitet është dëshmi e gjallë e trashëgimisë sonë të pasur. Kjo është një traditë që do të vijojë të mbështetet dhe të rritet nga viti në vit, pasi forcon identitetin tonë dhe i jep gjallëri komunitetit,” u shpreh Bellaj gjatë fjalës së tij përshëndetëse.

Festës lokale iu bashkuan figura të shumta publike, mes të cilëve edhe Kryeministri Edi Rama. Gjatë një fjale përshëndetëse të mbajtur jashtë protokollit zyrtar, kreu i qeverisë vlerësoi këmbënguljen e organizatorëve për ta kthyer këtë nismë në një sukses të prekshëm e të qëndrueshëm.

“Për mua kjo ishte e papritur, pasi nuk isha i lajmëruar që duhej të mbaja fjalë. Megjithatë, do të mundohem të mbijetoj. Në radhë të parë, dua të falënderoj Sopolin, i cili më dërgoi ftesën për të katërtin vit radhazi dhe këtë herë nuk e refuzova. Duke qenë se, siç e tha edhe gjykatësja—e cila kur jep gjykimin e ka të formës së prerë—katër vjet janë mjaftueshëm për të pasur besim se ideja funksionon. Ndaj, besoj se është rasti i duhur për të ardhur dhe për të dëshmuar së bashku me të tjerët suksesin e një nisme të lindur katër vjet më parë.” theksoi Kryeministri Rama.

Duke ruajtur natyrën e tij të komunikimit përmes batutave, Rama përshëndeti të ftuarit e tjerë VIP që ndodheshin aty, duke përfshirë ish-Presidentin Bamir Topi, kreun e Komitetit Olimpik (KOKSH) Fidel Ylli, dhe zyrtarë të tjerë, të cilët i cilësoi me humor si “miq të Vajzës”. Ai gjithashtu shkëmbeu batuta me kryebashkiakun Bellaj rreth potencialeve natyrore të zonës, si dhe me moderatoren e aktivitetit, duke krijuar një atmosferë të ngrohtë e miqësore.

“Nga ana tjetër, dua të përshëndes të gjithë të pranishmit. Përshëndes Presidentin Topi, i cili ndodhet i pranishëm këtu së bashku me Prefektin e Tiranës. Për këtë të fundit nuk e kuptoj mirë se për çfarë arsyeje ka ardhur, por me siguri është mik i vajzës. Dua të përshëndes edhe Kryetarin e Komitetit Olimpik, Fidel Yllin, i cili, deri para se të vija këtu, më rezultonte nga Skrapari, por nuk e di, mbase edhe ai është mik i Vajzës. Patjetër që dua të përshëndes Kryetarin e Bashkisë, Nertilin, si dhe ta falënderoj për informacionin rreth “ngjitjes së detit në majë të malit”, bashkë me ujin e kripur. Dua të përshëndes edhe Ministrin e Pushtetit Vendor, zotin Demo, i cili ndodhet këtu për të kontrolluar se si funksionon Bashkia e Selenicës. Gjithashtu, faleminderit shumë gjykatëses për prezantimin, i cili ishte vërtet impresionues që në fillim, veçanërisht me atë veshje që nuk është tipike për një person që ka kaluar Vetingun. Kështu që, faleminderit të gjithëve! Ju uroj të keni një festival të këndshëm dhe akoma më të mirë vitin e ardhshëm. E rëndësishme është që ju, të paktën, pushtetin gjyqësor këtu e keni me vete. Shumë faleminderit!”, theksoi kryeministri.

Në mbyllje të fjalës së tij, Rama i uroi komunitetit mbarëvajtje për festivalin, me dëshirën që viti i ardhshëm të sjellë një organizim edhe më të madh.

Përmes muzikës tradicionale, artit, aktiviteteve sportive dhe elementëve të trashëgimisë kulturore, “Vajza Fest” dëshmoi edhe këtë vit se tradita mund të ruhet dhe të marrë jetë në forma të reja. Është një festë që jo vetëm rizgjon jetën në zonat rurale, por forcon lidhjen e pazgjidhshme të komunitetit me identitetin, historinë dhe kulturën e tij.

/rtsh.al/