Të martën presidenca në Rumani njoftoi se ministri i Brendshëm liberal, Catalin Predoiu, është emëruar si kryeministër i përkohshëm, post që pritet ta mbajë deri në balotazhin e 18 majit. 

56-vjeçari ka shërbyer si kryeministër i përkohshëm edhe në vitin 2012.

Të hënën kryeministri rumun proevropian, Marcel Ciolacu, dha dorëheqjen. Vendimi erdhi pasi kandidati i ekstremit të djathtë, George Simion, fitoi të dielën raundin e parë të zgjedhjeve të përsëritura presidenciale, kurse rivali i tij nga koalicioni qeverisës u eliminua nga gara.

Presidenti i Partisë Socialdemokrate, Ciolacu, përmendi humbjen e Crin Antonescu, kandidatit të mbështetur nga qeveria e koalicionit, si argument për dorëheqjen.

Simion e fitoi raundin e parë të zgjedhjeve me rreth 41 për qind të votave. 38-vjeçari njihet si euroskeptik dhe mbështetës i presidentit amerikan Donald Trump. Më 18 maj ai do të përballet me Nicusor Dan, kryetarin e bashkisë së kryeqytetit, Bukureshtit, i cili doli i dyti në zgjedhje.

Presidenti i Rumanisë përfaqëson vendin në samitet e BE-së dhe NATO-s dhe mund të vërë veton në votimet e rëndësishme të Brukselit. Kreu i shtetit emëron gjithashtu kryeministrin dhe figura të tjera drejtuese.

Fitorja e ekstremit të djathtë në Rumani po ndiqet nga afër si nga Brukseli edhe nga Uashingtoni, pasi mund të shënojë një ndryshim në politikën e jashtme të Rumanisë. Vendi anëtar i BE-së dhe NATO-s luan një rol strategjik në krahun lindor të aleancës ushtarake pas nisjes së pushimit rus të Ukrainës. 

Gazetare: Vjollca Zharri

/rtsh.al/